Çevrilişə cəhd edənlərin məqsədi Türkiyədə mövcud hakimiyyəti devirmək idi.

Özünü "Yurdda Sülh Konseyi" adlandıran bir qrup Türkiyə Silahlı Qüvvələrinin rəsmi internet saytında və TRT-də yayımlanan bildirişdə ordunun dövlət idarəçiliyini ələ keçirdiyini, ölkədə fövqəladə vəziyyət və küçəyəçıxma qadağası tətbiq olunduğunu elan etdi.

Əvvəlcə paytaxt Ankarada polis akademiyası partladıldı. Daha sonra İstanbulda "Atatürk" hava limanı, TRT, AKP-nin Ankara qərargahı zəbt olundu. Türkiyə Respublikası Silahlı Qüvvələri Baş Qərargah rəisi Hulusi Akar, Quru qüvvələri komandanı Salih Zeki Çolak, Hava qüvvələri komandanı Abidin Ünal ve Jandarm qüvvələri komandanı Qalip Mendi, eləcə də prezidentin baş katibi əsir götürüldü. Türkiyə Böyük Millət Məclisi havadan atəşə tutuldu.

Küçələrə tanklar çıxarıldı. Ölkənin hava limanları, körpü və magistral yolları nəzarət altına alındı. TRT telekanalı, ardınca da "Doğan Media Mərkəzi" ələ keçirildi. AKP hökumətinin fəaliyyət imkanları iflic edildi.

Muğla vilayətinin Marmaris rayonunda hoteldə olan Türkiyə prezidenti Rəcəb Tayyib Ərdoğana qarşı sui-qəsd cəhdi oldu.

Bütün bu olanlardan sonra Ərdoğan “CNN türk” kanalında “Face Time” vasitəsilə canlı yayıma çıxdı. O, çevrilişə qarşı çıxmaq üçün xalqı küçələrə, meydanlara çıxmağa səslədi. Bu çağırışdan sonra bir çox vilayətdə çevrilişə qarşı nümayişlər keçirildi.

Türkiyədə baş vermiş hərbi çevrilişə cəhdin qarşısını almaq üçün keçirilən əməliyyat zamanı 265 nəfər, o cümlədən 104 qiyamçı hərbçi və 161 mülki şəxs həlak oldu, 1491 nəfər yaralandı. Hərbi çevrilişə cəhd edənlər arasında həbs olunan hərbçilərin sayı 3000-ə çatdı. Hadisə ilə əlaqədar 34 general, yüzlərlə hərbçi, hakim, prokuror saxlanıldı.

İyulun 21-də Türkiyə Milli Təhlükəsizlik Şurasının toplantısından sonra ölkə Böyük Millət Məclisi tərəfindən konstitusiyanın 120-ci maddəsinə əsaslanaraq, üçaylıq fövqəladə vəziyyət elan edildi.