Tarixin yaddaşına həkk olunan ən böyük xidmətlər insan qəlbinə yol tapan xidmətlərdir. Müəllim bu müqəddəs missiyanın daşıyıcısıdır. O, zamanın sərhədlərini aşaraq sabahı formalaşdıran, xalqın ümidlərini gələcəyə daşıyan mənəvi qüvvədir. Müəllimin əlindəki qələm bəzən bir ordunun gücündən daha qüdrətlidir. Çünki o qələm təkcə söz yazmır, talelər yaradır, şəxsiyyətlər formalaşdırır və millətin inkişafına istiqamət verir. Bu gün qazandığımız hər uğurda, ölkəmizin yüksəlişinə töhfə verən hər layiqli vətəndaşın yetişməsində müəllim zəhmətinin izi vardır.

Bu ali missiyanı şərəflə daşıyan insanlardan biri də Bakı şəhəri Süleyman Sani Axundov adına 172 nömrəli tam orta məktəbin direktoru, hörmətli Vəfa Bağırovadır. Onu 5 Oktyabr - Müəllimlər Günü münasibətilə dərin ehtiramla təbrik edirəm.

Vəfa Bağırovanın səmərəli fəaliyyəti, yüksək təşkilatçılıq bacarığı və məktəbin inkişafına verdiyi töhfələr onun qazandığı nüfuzun əsasını təşkil edir. Onun rəhbərliyi ilə 172 nömrəli məktəb yalnız bilik verilən məkan deyil, milli-mənəvi dəyərlərin, vətənpərvərlik ruhunun və vətəndaş məsuliyyətinin formalaşdığı əsl maarif ocağına çevrilib.

Vəfa Bağırova tədris prosesini idarə etməklə yanaşı, gələcəyimizin memarı olan gənclərin sağlam, düzgün və vətənpərvər ruhda yetişməsi üçün yorulmadan çalışır. Şagirdlərə göstərdiyi qayğı, müəllim əməyinə verdiyi dəyər və təhsilə səmimi münasibəti onun fəaliyyətinin ən bariz göstəricisidir.

Müəllim ömrü illərlə deyil, yetişdirdiyi insanlarla ölçülür. Hər şagird uğuru onun mənəvi zəfəri, hər layiqli vətəndaş zəhmətinin bəhrəsidir. Elə izlər var ki, zaman onları silə bilmir. Müəllimin qəlblərə bəxş etdiyi nur, aşıladığı dəyərlər və Vətən sevgisi də o unudulmaz izlərdəndir. Əsl müəllim yalnız sinif otağında deyil, yetirmələrinin düşüncəsində, davranışında və həyat yolunda yaşayır. Bu mənada müəllim ömrü faniliyin deyil, əbədiyyətin ünvanıdır.

5 Oktyabr - Müəllimlər Günü münasibətilə hörmətli Vəfa Bağırovaya möhkəm cansağlığı, uzun ömür, tükənməz enerji və yeni uğurlar arzulayıram. Müəllim adına sədaqəti, təhsilə və Vətənə xidmət yolundakı fədakarlığı daim yüksək qiymətləndirilsin. Yandırdığı elm və mənəviyyat çırağı heç zaman sönməsin, yetirmələrinin uğurları onun ən böyük qürur mənbəyinə çevrilsin.

Bayramınız mübarək olsun!

Mövsümağa Ədalətoğlu
AJB-nin üzvü 
yazıçı-publisist