Bu əlamətdar 3 Oktyabr – Türk Dövlətləri Əməkdaşlıq Günündə Təşkilatımızın institusional əsaslarını qoyan və Türk dövlətlərinin öz gələcəklərini birlikdə qurmaq istiqamətindəki ortaq arzusuna konkret ifadə qazandıran tarixi sənəd – Naxçıvan Sazişinin imzalanmasının 17-ci ildönümünü qürurla qeyd edirik. On yeddi il əvvəl ölkələrimiz sadə, lakin güclü bir inam ətrafında bir araya gəldilər: ortaq tarix, dil, mədəniyyət və qardaşlıq bağlarının strukturlaşdırılan, praktiki və gələcəyə yönəlmiş əməkdaşlığa çevrilməsi. Bu gün qət etdiyimiz yola qürurla nəzər sala bilərik.

Fact-info.az AZƏRTAC -a istinadən xəbər verir ki, bu ifadələr Türk Dövlətləri Təşkilatının (TDT) Baş katibi Kubanıçbek Ömüraliyevin 3 Oktyabr - Türk Dövlətlərinin Əməkdaşlıq Günü ilə bağlı açıqlamasında yer alıb.

Türk Dövlətləri Təşkilatı hərtərəfli və getdikcə daha çox fəaliyyətyönümlü beynəlxalq təşkilata çevrildiyini qeyd edən Baş katib deyib: “Bu gün əməkdaşlığımız siyasi dialoq, iqtisadiyyat, ticarət, nəqliyyat və enerjidən rəqəmsallaşma, süni intellekt, səhiyyə, ətraf mühit, təhsil, gənclər, təhlükəsizlik və kosmik texnologiyalara qədər uzanan 64 mexanizmi əhatə edir. Bu institusional genişləmənin tempi xüsusilə son illərdə diqqətəlayiqdir. Təkcə 2023-cü ildən etibarən 32 yeni əməkdaşlıq mexanizmi yaradılıb ki, bu da 2022-ci ilin sonunadək əvvəlki illər ərzində yaradılmış mexanizmlərin ümumi sayına bərabərdir. Bu mexanizmlər fəlakət və fövqəladə halların idarə edilməsi, ədliyyə və daxili işlər, ətraf mühit və ekologiya, sənaye, elm, innovasiya və texnologiya, müdafiə sənayesi, mərkəzi banklar, yaşıl maliyyə, maliyyə kəşfiyyatı, əqli mülkiyyət, əmək və sosial təminat, vergitutma, məhkəmə ekspertizası, metrologiya, analitik mərkəzlər, eləcə də texnoparklar və innovasiya agentlikləri daxil olmaqla əməkdaşlığımızın mühüm yeni istiqamətlərini açıb. Bu genişlənmə yalnız rəqəmlər baxımından əhəmiyyətli deyil. Bu, TDT-nin daha strateji, ixtisaslaşmış və operativ əməkdaşlıq sahələrinə keçdiyini, getdikcə daha müxtəlif milli qurumları Təşkilatın çərçivəsinə cəlb etdiyini nümayiş etdirir”.

Ömüraliyev qeyd edib ki, bununla belə, TDT-nin transformasiyasını yalnız artan görüşlərin, mexanizmlərin və ya əməkdaşlıq sahələrinin sayı ilə ölçmək olmaz. Eyni dərəcədə mühüm olan Türk Dövlətlərinin birlikdə fəaliyyət göstərmək və daha geniş beynəlxalq ictimaiyyətlə qarşılıqlı əlaqə qurmaq istiqamətində artan inamıdır.

“Siyasi məsləhətləşmələrimiz daha məzmunlu xarakter alıb, institusional şəbəkələrimiz daha da güclənib, beynəlxalq təşkilatlar və xarici tərəfdaşlarla qarşılıqlı əlaqələrimiz davamlı şəkildə genişlənib. Eyni zamanda, TDT beynəlxalq aləmdə daha güclü mövqe qazanıb. Beynəlxalq və regional təşkilatlar, üçüncü ölkələr və digər tərəfdaşlarla qarşılıqlı əlaqələrimiz davamlı şəkildə genişləyib, Türk Dünyasının beynəlxalq arenadakı səsi və görünürlüğü isə getdikcə daha qabarıq olub”, - deyə o vurğulayıb.

Qeyd edilib ki, bu gün ölkələrimiz və xalqlarımız birlikdə fəaliyyət göstərdiyimiz zaman malik olduğumuz potensialı əhəmiyyətini daha yaxşı başa düşürlər. Biz daha aydın şəkildə anlayırıq ki, əməkdaşlıq hər birimizin gücünü artırır və bizi birləşdirən tarixi və mədəni bağlar yalnız keçmişin mirası deyil, həm də ortaq gələcəyimizi qurmaq üçün güclü təməldir.

“Türk Dünyası 2040 baxışı bizə uzunmüddətli istiqamətimizi müəyyən edir. Qarşıdakı illərdə vəzifəmiz bu baxışl daha qətiyyətli şəkildə həyata keçirməyə çevirmək – iqtisadi əlaqələri dərinləşdirmək, texnoloji transformasiyanı qəbul etmək, cəmiyyətlərimizin dayanıqlılığını və rifahını gücləndirmək, gənc nəsillərimizə investisiya qoymaq və əməkdaşlığımızın vətəndaşlarımızın görə və hiss edə biləcəyi nəticələr verməsini təmin etməkdir. Eyni zamanda, öz aramızdakı əməkdaşlığımız gücləndikcə, daha geniş dünya ilə qarşılıqlı əlaqələrimiz də güclənməlidir.

Bu gün TDT daha möhkəm təməllər üzərində dayanır. Onun institutları daha yetkin, əməkdaşlığı daha dərin, tərəfdaşlıqları daha geniş və beynəlxalq mövcudluğu daha görünəndir. Ən başlıcası isə dövlətlərimizin və xalqlarımızın bu yolu birlikdə davam etdirmək əzmi daha güclüdür”, - deyə Kubanıçbek Ömüraliyev əlavə edib.