Şamaxıda böyük Azərbaycan şairi Xaqani Şirvaninin 900 illik yubileyinə həsr olunmuş elmi konfrans keçirilib.

Tədbir Prezident İlham Əliyevin “Böyük Azərbaycan şairi Xaqani Şirvaninin 900 illiyinin qeyd edilməsi haqqında” Sərəncamına əsasən Mədəniyyət Nazirliyi, Azərbaycan Milli Elmlər Akademiyası (AMEA) və Şamaxı Rayon İcra Hakimiyyətinin birgə təşkilatçılığı ilə baş tutub.

Konfransda Şamaxı Rayon İcra Hakimiyyətinin başçısı Tahir Məmmədov, AMEA-nın prezidenti İsa Həbibbəyli, mədəniyyət nazirinin müşaviri Orxan Fikrətoğlu, Mədəniyyət Nazirliyinin Azərbaycan dili və ədəbiyyat siyasəti şöbəsinin müdiri Vasif Qurbanzadə, AMEA-nın Nizami Gəncəvi adına Ədəbiyyat İnstitutunun direktor müavini, filologiya elmləri doktoru, dosent Mehman Həsənli, institutun Ortaq başlanğıc və intibah dövrü Azərbaycan ədəbiyyatı şöbəsinin müdiri, filologiya elmləri doktoru, professor İmamverdi Həmidov, Ədəbiyyat İnstitutunun elmi işçiləri, filologiya üzrə fəlsəfə doktorları Zəhra Allahverdiyeva və Elnarə Zeynalova, təhsil və mədəniyyət işçiləri, müəllimlər, eləcə də rayon ictimaiyyətinin nümayəndələri iştirak ediblər.

Çıxışlarda Xaqani Şirvaninin həyat və yaradıcılığından geniş bəhs olunub, Prezident İlham Əliyevin müvafiq Sərəncamının əhəmiyyəti qeyd edilib. Xaqani irsinin öyrənilməsi, qorunması və gələcək nəsillərə çatdırılmasının vacibliyi vurğulanıb. Həmçinin dahi şairin Azərbaycan ədəbiyyatının zənginləşməsində xidmətlərindən, böyük ədəbi irsindən və yaradıcılığının əsas xüsusiyyətlərindən danışılıb.

Xaqani Şirvaninin ədəbiyyatımızda özünəməxsus və mühüm mövqeyə malik olduğu bildirilib, onun yaradıcılığının ədəbi-bədii və fəlsəfi əhəmiyyəti diqqətə çatdırılıb.

Konfransda Xaqani Şirvaninin yaradıcılığı ilə bağlı elmi məruzələr dinlənilib, fikir mübadiləsi aparılıb.