2017-ci ilin Prezident İlham Əliyev tərəfindən Azərbaycanda “İslam Həmrəyliyi İli” elan edilməsi təkcə ölkəmiz üçün deyil, bütün müsəlman dünyası üçün vacib və əhəmiyyətli qərardır. Azərbaycan dövləti, Prezident İlham Əliyev qəbul etdiyi vacib qərarlarla ötən il və bu il bizim bu məsələlərə daha çox diqqət yetirməyimiz üçün kifayət qədər imkan yaradıb. Bu imkanlar bizi dünyanın üzləşdiyi çətin durumdan çıxması üçün mövqelərimizi birləşdirməyə, fikir mübadiləsi aparmağa və bu çağırışların qarşısını almaq istiqamətində səy göstərməyə vadar edir. Bu çağırışlar dünyamızı xaosa sürükləyən, müstəqil dövlətlərin konstitusion əsaslarını sarsıdan, xalqların və millətlərin minilliklər boyu əldə etdiyi nailiyyətləri bir anda yerlə-yeksan edən siyasətlərə, onların mahiyyətinə yenidən baxmağa imkan verir.

Bu fikirləri Bakıda keçirilən “İslam həmrəyliyi: dini və mədəni müxtəlifliyin harmoniyası” mövzusunda beynəlxalq konfrans zamanı Milli Məclisin sədr müavini Bahar Muradova jurnalistlərə müsahibəsində deyib.

Bahar Muradova bildirib ki, bu gün insanlığı kataklizmə sürükləyən çağırışlar, təhdidlər var. Azərbaycan bu çağırışların qarşısına İslam həmrəyliyinin, multikultural dəyərlərin təbliği, dini, etnik, milli dözümlülük, bir ərazini bölüşən müxtəlif xalqların və millətlərin nümayəndələrinə, onların mədəniyyətlərinə hörmət siyasəti ilə çıxır. Azərbaycanın dünyaya verdiyi mesajların mahiyyətində bu amillər dayanır. Azərbaycan o ölkələrdəndir ki, onun milli, dini və etnik münasibətləri tənzimləyən qanunları bu ərazidə yaşayan xalqların və millətlərin minilliklər ərzində formalaşmış birgəyaşayış qaydalarına və onların arasındakı harmoniyaya əsaslanır.

Milli Məclisin sədr müavini vurğulayıb ki, Prezident İlham Əliyevin 2017-ci ili “İslam Həmrəyliyi İli” elan etməsi ilə, bununla əlaqədar olaraq keçirilən tədbirlərlə, ümumiyyətlə, ölkə rəhbərliyinin bu günə qədər yeritdiyi siyasətlə Azərbaycan bütün dünyaya örnək bir dövlət olduğunu göstərir.