Türkiyənin “Haber Global” telekanalı Azərbaycan hökumətinin Fələstində uşaqlar üçün orta məktəb inşa etməsi planı ilə bağlı reportaj hazırlayıb.

İslam Əməkdaşlıq Təşkilatının (İƏT) Xarici İşlər Nazirləri Şurasının Ciddə şəhərində baş tutan fövqəladə sessiyasında iştirak edən Azərbaycanın xarici işlər naziri Ceyhun Bayramovun məsələ ilə bağlı açıqlamasına diqqət çəkən telekanal 600 fələstinli uşaq üçün nəzərdə tutulan yeni məktəbin Nablus şəhərində yerləşəcəyini bildirir. Reportajda qeyd olunur ki, yeni məktəb layihəsi Azərbaycanın Fələstin xalqına humanitar dəstəyinin bir hissəsi olacaq. Belə ki, 2024-2025-ci illər üzrə 15 fələstinli tələbəyə "Heydər Əliyev adına Beynəlxalq Təhsil Qrantı" veriləcək.

Telekanal Azərbaycanın 2023-cü ildən etibarən Fələstinə 2 milyon dollar məbləğində yardım göstərdiyi xatırladır. “Azərbaycan Fələstin məsələsində Türkiyə ilə eyni mövqeyi paylaşır. Prezident İlham Əliyev hər fürsətdə bəyan edir ki, Azərbaycan Fələstin xalqının azadlığı və müstəqilliyini dəstəkləyir, münaqişənin Şərqi Qüdsün Fələstin Dövlətinin paytaxtı olmaqla “iki dövlət” prinsipi əsasında sülh yolu ilə həllinin tərəfdarıdır”, - deyə reportajda bildirir.