Yeni tədqiqat şizofreniya ilə bağlı beyin atrofiyası nümunələrini birləşdirən unikal beyin şəbəkəsini müəyyən edib. Səkkiz mindən çox iştirakçının məlumatlarının təhlili əsasında tədqiqat qrupu bu şəbəkənin şizofreniyanın müxtəlif mərhələlərində və simptomlarında müşahidə olunan atrofiya nümunələrini birləşdirdiyini aşkarlayıb.

AZƏRTAC “ScienceDaily” saytına istinadla xəbər verir ki, “Nature Mental Health” jurnalında dərc olunan tədqiqatda 90 neyroimaging araşdırmasının nəticələri sintez edilib. Məlumatlar yeni diaqnoz qoyulmuş şizofreniya xəstələri, xroniki xəstəlik daşıyıcıları və sağlam fərdlərdən ibarət idi. Tədqiqatçılar atrofiya yerləri ilə funksional beyin şəbəkələri arasındakı əlaqəni müəyyənləşdirmək üçün koordinat şəbəkəsinin xəritəsi (CNM) texnikasından istifadə ediblər. Nəticələr şizofreniya ilə əlaqəli ikitərəfli insula, hipokampus və fusiform korteks kimi beyin bölgələrini vurğulayıb. Maraqlıdır ki, bu əlaqə xəritəsi Alzheimer, əsas depressiv pozğunluq və maddə istifadəsi pozğunluğu olan xəstələrdəki beyin şəbəkələrindən fərqlənib. Bu, şəbəkənin şizofreniyaya xas olduğunu göstərib. Müşahidələr göstərib ki, şizofreniyanın müxtəlif mərhələlərindəki və fərqli simptomları olan xəstələrdə bu şəbəkə sabit qalır və antipsikotik müalicələr nəticəsində əhəmiyyətli dəyişiklik baş vermir.

Araşdırmanın əsas müəlliflərindən biri, Brigham Psixoz Proqramının tibbi direktoru Əhməd T.Makhlouf qeyd edib: “Şizofreniyanın əsas xüsusiyyəti ola biləcək unikal və vahid bir şəbəkə tapdıq.”

Baş müəllif Şan H.Siddiqi isə araşdırmanın məqsədini “fili yenidən qurmağa cəhd” kimi xarakterizə edib.

Tədqiqatın gələcək mərhələsi, şizofreniya şəbəkəsinə qoşulmuş beyin stimulyasiya sahələrini qiymətləndirəcək klinik sınaqların həyata keçirilməsini nəzərdə tutur. Transkranial maqnit stimullaşdırılması (TMS) vasitəsilə bu şəbəkə ilə əlaqəli stimullaşdırma yerləri sınaqdan keçiriləcək. Tədqiqatçılar bu yanaşmanın şizofreniyanın fərdi müalicəsinə yeni baxış gətirəcəyinə ümid edirlər.