Azərbaycan Prezidentinin Cəbrayıl rayonunun işğaldan azad edilmiş Cocuq Mərcanlı kəndinin bərpası ilə bağlı imzaladığı Sərəncam torpaqlarımızın düşmən tapdağından azad edilməsi istiqamətində atılan və qələbəyə inamı təsdiqləyən mühüm addımlardan biridir.

Bu fikri Azərbaycan Hərb Tarixi Muzeyinin rəisi, ehtiyatda olan polkovnik Əzizağa Qəni-zadə AZƏRTAC-a açıqlamasında deyib.

Ehtiyatda olan polkovnik bildirib ki, aprel döyüşlərində qəhrəman əsgər və zabitlərimiz düşmənin təxribatlarına cavab verərək onlara sarsıdıcı zərbə endirib işğalçıları döyüş texnikasını, silah və sursatını atıb böyük itkilərlə təşviş içində mövqelərini qoyub qaçmağa məcbur etdi. Düşmənin güclü müdafiə mövqelərini darmadağın edən Azərbaycan əsgəri öz ruh yüksəkliyi və döyüş qabiliyyətini bütün dünyaya göstərdi. Azərbaycan xalqı torpaqlarının düşmən tapdağı altında olması ilə heç vaxt barışmayacağını və onun uğrunda canından keçməyə hazır olduğunu bir daha sübut etdi.

“Aprel döyüşlərində əbədiyyətə qovuşan əsgər və zabitlərimiz qəhrəmancasına vuruşaraq həm düşmənin bizim yaşayış məntəqələrini atəşə tutaraq dinc əhalini qətlə yetirməsinin qarşısını aldı, həm də o ərazilərdə əhalinin gündəlik həyat fəaliyyətinin bərpa edilməsini və təhlükəsiz yaşamasını mümkün etdi. Bunun nəticəsi olaraq, Silahlı Qüvvələrin Ali Baş Komandanı, Prezident İlham Əliyevin yanvarın 24-də Cəbrayıl rayonunun işğaldan azad edilmiş Cocuq Mərcanlı kəndinin bərpası ilə bağlı tədbirlər haqqında Sərəncam imzalaması çox gözəl bir addımdır. Tarixən burada yaşamış dinc əhalinin öz doğma yurdlarına qayıdıb əmin-amanlıq şəraitində yaşaması artıq təmin edilir. Azərbaycan Prezidenti, Ali Baş Komandan İlham Əliyevin imzaladığı Sərəncam torpaqlarımızın işğaldan azad edilməsinə, qaçqın və məcburi köçkünlərimizin doğma yurdlarına qayıdacağına olan inamı daha da artırdı”, - deyə Ə.Qəni-zadə vurğulayıb.