Bu konfransın təşkilinə görə Azərbaycan Respublikasının rəhbərliyinə minnətdaram. Artıq birinci il deyil ki, mən Bakıda müasir dünyanın ən mühüm mövzularından birini - islamofobiya mövzusunu qaldıran konfransda iştirak edirəm.

Fact-info.az-ın məlumatına görə, bu sözləri “Müxtəlifliyin qorunması: 2024-cü ildə islamofobiya ilə mübarizə” mövzusunda keçirilən beynəlxalq konfransda iştirak edən Rusiya Federasiyası Müsəlmanları Ruhani İdarəsi sədrinin birinci müavini Damir Muxetdinov AZƏRTAC -a müsahibəsində deyib.

“Təəssüflər olsun ki, dünyada islamofobiya o qədər yüksək səviyyəyə və elə bir təcavüz həddinə çatıb ki, bir çox insanlar və ölkələr xüsusi olaraq İslamı və müsəlmanları təhqir etməyi bir növ şücaət və şərəf hesab edirlər. Biz bütün dünyada vandalizm aktlarının baş verdiyini, müsəlmanların müqəddəs kitabı olan “Quran”ın yandırılmasını görürük. Bütün bunlar dövlət orqanlarının himayəsi və köməyi ilə baş verir. Polisin “Quran”ı yandıranları, müsəlman dəyərlərinə istehza edənləri qoruduğunu görürük. Müsəlman məbədlərinin dağıdılmasının necə davam etdiyinin də şahidiyik”, - deyə D.Muxetdinov qeyd edib.

Onun sözlərinə görə, Qarabağ ərazisində baş vermiş dəhşətli və faciəli hadisələr, tarixi abidələrin, məscidlərin, kilsələrin, mədəniyyət obyektlərinin yer üzündən silinməsi hər kəsin yadındadır. O vurğulayıb ki, Azərbaycan xalqı öz milli liderinin rəhbərliyi ilə ədalətin bərqərar olması, ölkənin tərəqqisi və yeni inkişaf mərhələsinə qədəm qoyması üçün bütün zəruri tədbirləri həyata keçirir.

Sədr müavini əmin olduğunu bildirib ki, konfrans zamanı nəinki çoxlu tövsiyə və məsləhətlər, yaxud hər hansı təkliflər səsləndiriləcək, bu tədbir, həmçinin bütün dünyada islamofobiya problemlərinin həllinə əməli töhfə verəcək.