8 Mart – Beynəlxalq Qadınlar Günü ənənəvi olaraq ailələrdə, müxtəlif idarə və müəssisələrdə, təhsil və tərbiyə ocaqlarında qeyd olunur. Ana və bacılarımızın, ömür-gün yoldaşlarımız və xanım həmkarlarımızın şərəfinə təşkil olunan bayram tədbirlərinin iştirakçıları da fərqli olurlar. Bakı şəhərində yerləşən “Dəniz” uşaq bağçasında keçirilmiş tədbirdə olduğu kimi... Burada uşaqların dəvətini alanlar şəhid anaları idi.

Yaşlı nəslin nümayəndələri ilə gənclərin və uşaqların ünsiyyətinə xüsusi önəm verən “Ahıllara və Tənhalara Dəstək” İctimai Birliyi uşaq bağçasının bu maraqlı təşəbbüsünü böyük həvəslə qarşıladı və əzəli torpaqlarımızı işğaldan azad etməklə ölkəmizin ərazi bütövlüyünün təmin olunması uğrunda döyüşlərdə şəhidlik zirvəsinə ucalmış Vətən övladlarının analarını bağça müdiriyyəti adından uşaqlarla görüşə dəvət etdi.

Doğrusu, müharibənin, Vətən uğrunda şəhidliyin, övlad itkisi kimi faciənin nə olduğunu dərk etməyən körpələrin igid oğullarını qurban vermiş analarla nə cür görüşəcəklərindən, nədən danışacaqlarından narahat idik. Amma əbəs yerə...

Şəhid övladlarının uşaqlıq dövrü ilə bağlı xatirələrini gövrələrək bölüşən, igid oğulları barədə kədərdən daha çox fəxr və qürurla danışan, düşmən üzərində Qələbənin nəyin bahasına əldə edildiyindən söz açan şəhid analarını böyük maraqla dinləyən uşaqlar sanki bir anda böyümüşdülər – onların söhbət əsnasında verdikləri suallar qonaqları düşündürür, xatirələrini daha çox bölüşməyə vadar edir, hər iki tərəfin səmimiliyi isə bizi sevindirirdi. Görüş zamanı uşaqların Vətən və Ana mövzusunda şeirlər, müdrik kəlamlar səsləndirməsini, nəğmələr və tamaşa parçaları ifa etməsini şəhid analarından biri haqlı olaraq bircə kəlmə ilə dəyərləndirdi: “Bu körpələrin oğlumun ruhunu şad etmələri mənim üçün ən böyük təsəllidir".

Tədbirin sonunda qonaqlara bayram sovqatları təqdim edildi. “Ahıllara və Tənhalara Dəstək” İctimai Birliyinin sədri olaraq QHT-nin ahıl yaşlı fəalları və şəhid anaları adından bayram tədbirini yüksək səviyyədə təşkil etdiyinə görə "Dəniz" uşaq baxcasının təsiscisi Dürrə xanım Rzayevaya, bağçanın direktoru Sevda Qənizadəyə və bütün kollektivə minnətdarlığımı bildirirəm və bu cür görüşlərin fərqli nəsillərin təmsilçiləri üçün faydalı olduğunu diqqətə çatdırıram.  

    
Ruhiyyə Məmmədova,
“Ahıllara və Tənhalara Dəstək” İctimai Birliyinin sədri