Şamaxı Rayon İcra Hakimiyyətinin və Dağlıq Şirvan Regional Mədəniyyət İdarəsinin birgə təşkilatçılığı ilə Şamaxı Yaradıcılıq Mərkəzində şəhid heykəltaraş Samir Kaçayevin xatirəsinə həsr edilmiş “Daşa can verib, “Küləklə sovrulan”” adlı yaradıcılıq sərgisi keçirilib.

Şəhidin Çuxuryurd kəndində yerləşən məzarı ziyarət olunduqdan sonra, onun ailə üzvləri, Şamaxı Rayon İcra Hakimiyyətinin başçısı Tahir Məmmədov, Dağlıq Şirvan Regional Mədəniyyət İdarəsinin rəisi Səxavət Məmmədov, Azərbaycan Dövlət Rəssamlıq Akademiyasının müəllimləri və ictimaiyyət nümayəndələri sərgidə iştirak ediblər.

Tədbirdə iştirak edənlər Samir Kaçayevin həyat və yaradıcılığından, onun yüksək vətənpərvərliyindən söz açıblar. Bildirilib ki, hələ uşaqlıqdan onun Vətənə, torpağa olan sevgisi aydın hiss edilirmiş.

Rayon icra hakimiyyətinin başçısı çıxış edərək şəhidimizin ailə üzvlərinə başsağlığı verib, torpaq uğrunda şəhid olmağın ən ali, uca zirvə olduğunu qeyd edərək şəhidlərin daim elin yaddaşında xatırlanacağını vurğulayıb. Digər qəhrəman oğullarımız kimi heykəltaraş Samir Kaçayevin də Vətən uğrunda canından keçdiyini, əbədiyyətə qovuşduğunu bildirərək, müharibə veteranlarına, şəhid ailələrinə dövlət tərəfindən göstərilən diqqət və qayğıdan söz açıb.

Samir Kaçayev 1994-cü il martın 6-da Şamaxı rayonunun Çuxuryurd kəndində dünyaya gəlib. 2011-ci ildə orta təhsilini bitirdikdən sonra elə həmin il Azərbaycan Dövlət Rəssamlıq Akademiyasının bakalavr, 2015-ci ildə magistr pilləsinə daxil olub. Lakin Vətənə olan borcu təhsilindən daha üstün sayan Samir hərbi xidmətini Tərtərdə yerləşən hərbi hissədə çəkməyə başlayıb. 2016-cı ilin aprel ayında torpaqlarımızın azad olunması uğrunda erməni işğalçılarına qarşı Talış kənd istiqamətində gedən döyüşlərdə qəhrəmancasına şəhid olub. Samir Kaçayev ölümündən sonra Azərbaycan Respublikasının Prezidenti İlham Əliyevin Sərəncamı ilə “İgidliyə görə” medalı ilə təltif edilib. Prezident İlham Əliyev, birinci xanım Mehriban Əliyeva 2021-ci il noyabrın 1-də Şamaxıya səfər zamanı Samir Kaçayevin “Küləklə sovrulanlar” kompozisiyasının instalyasiyasına baxış keçirib, şəhidin ailəsi ilə görüşüblər.