31 Dekabr Dünya Azərbaycanlılarının Həmrəyliyi Günü və Yeni il münasibəti ilə  “Zəfər Yolu” Müharibə İştirakçılarına və Şəhid Ailələrinə Humanitar Dəstək İctimai Birliyinin təşkilatçılığı ilə Xüsusi Təyinatlı Qüvvələrin “N” saylı hərbi hissəsində bayram tədbiri təşkil edildi.

Fact-info.az  Zefernews.az-a istinadən xəbər verir ki, Dövlət himninin səsləndirilməsi və şəhidlərimizin əziz xatirəsinin 1 dəqiqəlik sükutla yad edilməsi ilə başlanan tədbiri “Xəyal Media Qrup”un rəhbəri Xəyal Qurbani aparıcı olaraq, 44 günlük müharibədə Vətən tarixini şanlı zəfərlə yazan Azərbaycan əsgərinin yenilməzliyindən, Vətən sevgisindən, mübarizliyindən söz açaraq Azərbaycanımızın ərazi bütövlüyü uğrunda qəhrəmancasına döyüşmüş, Dövlət bayrağını işğaldan azad olunan torpaqlarımızda qaldırmış və bu qəhrəmanlıq dastanında öz canlarını fəda etməklə şəhidlik zirvəsinə ucalmış əsgər və zabitlərimizin xalqımızın qəlbində unudulmayacaq bir iz buraxdığını xüsusi olaraq qeyd etdi.
Vətənimizin təhlükəsizliyi və sərhədlərinin toxunulmazlığı naminə xidmət edən qəhrəman əsgər və zabitlərimizin həyat yolu gənc nəsil üçün bir vətənpərvərlik məktəbidir. 44 günlük Vətən müharibəsində qədim xalqımızın zəngin hərb tarixində növbəti şanlı səhifə açmış Silahlı qüvvələrimizin hər bir üzvü qəhrəman ulu əcdadlarının layiqli davamçılarıdır. Xalqımız onlarla fəxr edir və qürur duyur.
Bayram tədbirində Azərbaycanın tanınmış incəsənət nümayəndələri – Respublikanın  əməkdar artisti Kəmalə Vahabzadə, Azərbaycan Dövlət Akademik Filarmoniyasının solisti Məhbubə Kərimli, Beynəlxalq Vokalçılar Festivalının laureatı, ADMİU-nin magistri Xasay Şıxıyev, Baba Dərələyəzli, Nurlan Ordubadlı, Sevinc Şuşalı zəfər ruhlu  mahnılar ifa etdilər. Onları nağarada Ağəli Fərəcullayev, sazda İlqar Babayev, sintezatorda  Bəhruz Məmmədov  müşayiət etdi.
Qeyd edək kı, “Zəfər Yolu” Müharibə İştirakçılarına və Şəhid Ailələrinə Humanitar Dəstək İctimai Birliyinin icraçı direktoru Jalə İbadova,  BTB Holdinqin direktoru Amil İsmayılov, AYB və Anasan Yazıçılar Birliyinin üzvü, “Gold Faces Of Turkey Awards” mükafatçısı, yazıçı-publisist  Quba şəhər 6 saylı tam orta məktəbin direktor müavini Cəmafər Əliyeva, Hacıbala Əhmədov tədbirdə  iştirak etdilər.
Bayram tədbirinin sonunda söz “Zəfər Yolu” Müharibə İştirakçılarına və Şəhid Ailələrinə Humanitar Dəstək İctimai Birliyinin və www.zefernews.az saytının rəhbəri Pərvanə Abdullayevaya verildi. Pərvanə xanım bu günü qəhrəman oğullarımızla birgə qeyd etdiklərinə görə çox böyük qürur hissi keçirdiyini xüsusi olaraq qeyd etdi və  yaradılan bu fürsət üçün hərbi hissənin rəhbərliyinə göstərdiyi böyük etimada görə dərin təşəkkürünü bildirdi. 31 Dekabr Dünya Azərbaycanlıların Həmrəylik Günü və Yeni il bayramı münasibətilə hərbi hissənin əsgər və zabit heyətini səmimi qəlbdən təbrik edib, onlara müvəffəqiyyətlər arzuladı.
Bayram konsertinin keçirilməsində əməyi olan bir qrup şəxsə “N” saylı hərbi hissənin Fəxri Fərmanı təqdim olundu.