Fact-info.az xəbər verir ki, bu barədə Milli Məclisin İctimai birliklər və dini qurumlar komitəsinin “Azərbaycanda dövlət-din münasibətləri: real durum və perspektivlər” adlı iclasında deputat Ceyhun Məmmədov bildirib.

 Deputat xatırladıb ki, Azərbaycan müstəqilliyini bərpa edən zaman ölkədə 18 məscid mövcud idi. Hazırda Azərbaycanda 2253 məscid, 748 pir və ziyarətgah, 16 kilsə, 7 sinaqoq və digər ibadət yerləri fəaliyyət göstərir. "Eyni zamanda Dini Qurumlarla İş üzrə Dövlət Komitəsində 993 dini icma qeydiyyatdan keçib ki, onlardan 956-sı İslam, 37-si qeyri-islam qurumudur. Həmin icmalardan 26-sı xristian, 8-i yəhudi, 1-i krişna, 2-si bəhai icmasını təmsil edir. Onu da qeyd etmək lazımdır ki, hazırda bəzi dövlətlərin, o cümlədən İran rejiminin Azərbaycanda dindən siyasi məqsədlər və insanlar arasında qarşıdurma yaratmaq məqsədilə istifadəsinə, dindarlar arasında radikal fikirlərin yayılmasına çalışması açıq hiss olunur. Həmin qüvvələr dindar insanları siyasi proseslərə və münaqişələrə cəlb edərək onlardan hakimiyyətə qarşı istifadə etməyə, dini məsələləri siyasiləşdirməyə çalışırlar. Öz növbəsində Azərbaycanın müvafiq dövlət qurumları ölkəmizdə dini durumun sabitliyinin qorunması, dini dözümlülük ənənələrinin qorunub saxalanılması və radikallıq meyllərinin qarşısının alınması istiqamətində ardıcıl tədbirlər həyata keçirir”, - deyə C.Məmmədov vurğulayıb.