Şəhid qardaşlıarımız ən ali məqama yüksələn şəxslərdir. Torpaqlarımızın azadlığı uğrunda canını fəda edən minlərlə igidimizdən biri də şəhid Nəbiyev Elmar Elman oğludur.

Nəbiyev Elmar 22 mart 2001-ci ildə Bakı şəhəri, Pirallahı rayonunda anadan olmuşdur. 2007-ci ildə həmin rayonun 186 nömrəli tam orta məktəbin 1-ci sinifinə daxil olub. Məktəb illərində idmanla məşğul olub. Kosiko ko idman növündə həmişə keçirilən turnirlərdə 1-ci və 2-ci yerləri tutaraq kubok, medal və diplomlarla təltif olunub. Bundan əlavə keçirilən futbol yarışlarında da iştirak edən qəhrəmanımız bu sahədə də diplom və medallarla təltif olunub. Hələ 8 yaşı olarkən məktəbin fəal şagirdlərindən biri kimi “İstedadlar sorağında” kitabında onun haqqında da məqalə yazılıb.
Elmar 2018-ci il 186 nömrəli məktəbi bitirib həmin ildə də Odlar Yurdu Kollecinin Bank işi fakültəsinə (qiyabi) qəbul olub. Elmar subay idi. O, 2019-cu ildən Azərbaycan Silahlı Qüvvələrinin əvvəlcə Ağcabədi rayonunda, sonra isə Füzuli rayonunda yerləşən "N" saylı hərbi hissəsində həqiqi hərbi xidmətdə olub.

Azərbaycan Ordusunun əsgəri olan Elmar Nəbiyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Füzulinin azadlığı uğrunda gedən döyüşlərdə iştirak edib. Döyüş meydanında böyük fədakarlıq göstərən hər bir Azərbaycan əsgəri kimi, Elmarın əsas məqsədi tarixi torpaqlarımızı düşməndən azad etmək idi. O, müqəddəs amallar uğrunda son ana qədər vuruşur. Elmar Nəbiyev oktyabrın 5-də Füzuli döyüşləri zamanı Şəhid olub. Bakı şəhərinin Pirallahı rayonunda dəfn olunub.
Şəhidimizin anası Çiçək xanımın verdiyi məlumata görə, Elmar Aşağı Alıxanlı istiqamətində gedən döyüşlər zamanı ağır yaralanıb. Döyüş yoldaşları bildirib ki, bir müddət Elmar huşsuz vəziyyətdə olub. Sonradan dünyasın dəyişib. Elmar Nəbiyevin bu gün ruhu şaddır. Onun böyük amallar uğrunda döyüşdüyü Azərbaycan torpaqları azad olundu. Elmar kimi qəhrəmanlarımızın döyüşkən ruhu, qorxmazlığı nəticəsində Azərbaycanın qüruru, ərazi bütövlüyü özünə qayıtdı.
Bu qayıdış tariximizin ən möhtəşəm səhifəsinə çevrildi. Tarixşünaslıqda bu qəhrəmanlıq səhifəsi hər zaman qeyd olunacaq. Gələcək nəsillər üçün qürur mənbəyinə çevriləcək. Şəhid valideynlərinin, ailələrinin nisgilini anlayırıq. Lakin Şəhidlərimiz elə bir şücaət göstəriblər ki, onlar böyük bir nəslin fədakar, milli ruhda yetişməsində örnək oldular.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15 dekabr 2020-ci il tarixli Sərəncamına əsasən Nəbiyev Elmar ölümündən sonra "Vətən uğrunda" medalı ilə təltif edildi.

Həmçinin Azərbaycan Prezidenti İlham Əliyevin digər 25 dekabr 2020-ci il tarixli Sərəncamına əsasən Şəhid Nəbiyev Elmar Elman oğlu "Xocavəndin azad olunmasına görə" və "Füzulinin azad olunmasına görə" medalları ilə təltif edilib. Məkanı cənnət olsun.

Fact-info.az