Bölgədə yeni siyasi reallıq yarandı, Azərbaycan güc və söz mərkəzinə çevrildi. İkincisi, Azərbaycanın yeni dövrün tələblərinə cavab verən hibrid müharibə aparmaq potensialına malik olması onun hərbi qüdrətinin yüksək səviyyədə olduğunu və bu isə, öz növbəsində, ölkəmizin bölgədə regional gücə çevrilməsinə zəmin yaratdı. Üçüncüsü, Azərbaycan yeni dövrdə karbohidrogen ehtiyatların Avropaya çatdırılması istiqamətinə yeni meqalayihələrin icrası ilə yaranmış enerji böhranında alternativsiz tərəfdaşa çevrildi.

Fact-info.az-ın  məlumatına görə, bu fikirləri AZƏRTAC-a açıqlmasında politoloq Amid Əliyev söyləyib.

O qeyd edib ki, Azərbaycan Avropanın siyasi və iqtisadi maraq dairələri üçün strateji tərəfdaşlardan biridir. Enerji təminatının milli təhlükəsizlik məsələsi ilə sintez olduğu bir dövrdə Azərbaycanın bu proseslərdəki rolu danılmaz bir amilə çevrilib.

Bunlarla yanaşı, Azərbaycanın diplomatiya sahəsindəki uğurları, xüsusilə də Prezident İlham Əliyevin bir strateq və mahir diplomat kimi təcrübəsinin öyrənilməsi də Avropa tərəfindən diqqət mərkəzində saxlanılan faktorlardan biridir. Müharibə zamanı dövlətimizin başçısının nümayiş etdirdiyi siyasi-diplomatik ustalıq və dünyanın bir sıra aparıcı KİV-lərinə verdiyi arqumentli və detallı cavablar hələ uzun müddət ekspertlər üçün əyani və dəyərli vəsait rolunu oynayacaq.

“Əldə edilmiş uğurların arxasında məhz dövlətimizin başçısının dərin zəkası və dəyərli təcrübəsi dayanır. Bu səbəbdəndir ki, Azərbaycan Prezidentinin dərin zəkası və dəyərli təcrübəsi enerji diplomatiyasının uğurla həyata keçirilməsindən sonra hamılıqla heç bir şübhəyə yer qoymadan qəbul edilir. Dəfələrlə bir sıra Avropa dövlətlərinin, siyasi və iqtisadi təşkilatlarının rəhbərləri tərəfindən Prezident İlham Əliyevin ünvanına bunu təsdiq edən müraciətlər səslənib.

Fevralın 17-19-da Avropa məkanında vacib siyasi diskussiya platforması sayılan Münxen Təhlükəsizlik Konfransının (MTK) növbəti iclası keçiriləcək. Görüşə dəvət olunan az sayda dövlət başçılarından biri də Azərbaycan Prezidentidir. Bu heç də təsadüfi deyildir. Təqribən 3 il bundan öncə dövlətimizin başçısının elə bu konfrans çərçivəsində Ermənistanın baş nazirinə cavab olaraq göstərdiyi master-klas yaddan çıxmayıb. İndiki şəraitdə isə Azərbaycan Prezidenti Müzəffər bir strateq kimi konfrans iştirakçıları üçün daha maraqlı və cəlbedicidir. Qalibiyyətin sirləri, yeni iqtisadi imkanlar, enerji diplomatiyası və Azərbaycanın bölgədəki danılmaz rolu ölkəmizin bu konfransdakı iştirakının əsas ana xəttini təşkil edən elementlərdir. Azərbaycan Prezidenti bu dəfə də Avropa məkanında siyasi, iqtisadi və diplomatik müstəvidə növbəti master-klasa imza atacaq”, - deyə A.Əliyev vurğulayıb.

O əlavə edib ki, Münxen Təhlükəsizlik Konfransın, eyni zamanda, son zamanlar bölgədə baş verən siyasi proseslər barədə həqiqi faktların dünya ictimaiyyətinə çatdırılması qismində də olduqca vacib bir platformadır. Siyasi və iqtisadi beyin mərkəzlərinin və eləcə də bir sıra liderlərin iştirak edəcəyi bu konfransda müzakirə mövzularının daha da zəngin olacağını indidən demək mümkündür.

Heç şübhəsiz ki, Azərbaycanın bölgədəki siyasi, iqtisadi və hərbi potensialı fonunda yaratmış olduğu yeni siyasi reallığın vacib konturları konfransın əsas görüşlərində və kuluarlarda müzakirə mövzusu olacaq.