Xarici ölkə səfirliyinin mühafizəsinin və onun əməkdaşlarının təhlükəsizliyinin təmin edilməsi ilə bağlı Diplomatik Əlaqələr haqqında Vyana Konvensiyasından irəli gələn müvafiq öhdəliklər kobud şəkildə pozulmuşdur. Səfirliyin ərazisi onun təmsil etdiyi dövlətin ərazisi hesab olunursa, dövlətimizin İranda fəaliyyət göstərən diplomatik missiyasına qarşı törədilmiş qanlı terror hücumu qonşu dövlətin Azərbaycana təcavüzü kimi qiymətləndirilməlidir. Azərbaycan Respublikasının Prezidenti cənab İlham Əliyev ölkəmizin səfirliyinə hücumu qəti şəkildə pisləyərək, səfirlik əməkdaşının qətlə yetirilməsi ilə nəticələnən terror aktının araşdırılmasını və terrorçuların cəzalandırılmasını tələb edib.

Ölkəmizin Xarici İşlər Nazirliyi günahkarların müəyyən edilərək layiqli cəza almasını təmin etmək üçün müvafiq beynəlxalq mexanizmlərin verdiyi bütün imkanlardan istifadə ediləcəyini bildirib. İranın müvafiq dövlət orqanları və qurumları tərəfindən aparılan ilkin araşdırmaların nəticələrinin bu qanlı hadisənin arxasında şəxsi motivlərin dayandığını göstərməsi ilə bağlı fikirlə razılaşmaq çətindir. Rəsmi İranın ölkəmizə olan münasibəti bəllidir və baş vermiş hadisə hər iki ölkə arasında onsuz da mürəkkəb olan münasibətləri daha da gərginləşdirmək cəhdi kimi qiymətləndirilməlidir. Ölkəmizin səfirliyinə qarşı terror aktını planlaşdıran və həyata keçirənlər bir həqiqəti unutmasınlar – dağıdıcı zərbəsinin şahidi olduqları dəmir yumruq yerindədir. Və bu yumruğun zərbəsinə təkcə düşmənimiz yox, onun dostu da məruz qala bilər.

Ruhiyyə Məmmədova

“Ahıllara və Tənhalara Dəstək” İctimai Birliyinin sədri