Fact-info.az xəbər verir ki, tədbirdə çıxış edən Türkiyə-Azərbaycan Dostluq, Əməkdaslıq və Həmrəylik Fondunun rəhbəri, Türkiyə Prezidenti yanında Xarici siyasət və təhlükəsizlik şurasının üzvü, prof. Aygün Attar 33 il öncə baş vermiş 20 Yanvar hadisələrinin Azərbaycanın müasir tarixində faciəli günlərdən biri, eyni zamanda xalqımızın qəhrəmanlıq səhifəsi kimi yer aldığını bildirərək qeyd edib ki, Ümumxalq Hüzn Günü müstəqillik, azadlıq uğrunda mübarizəni daha da alovlandırmaqla xalqımızın yenilməz iradəsinin rəmzinə çevrilib. 

Professor Aygün Attar çıxışında dövrün totalitar rejiminin milli azadlıq, istiqlaliyyət uğrunda aparılan mübarizədə xalqın əzmini qırmaq cəhdlərinin boşa çıxmasından da söz açaraq qeyd edib ki, 20 Yanvar faciəsinin vurduğu sağalmaz yaralar xalqımızın xatirəsində hər zaman yaşayacağ,  şəhidlərimizin qanı bahasına əldə olunan azadlıq və müstəqilliyin heç vaxt əldən verilməyəcək.Azərbaycanın Türkiyədəki səfiri Rəşad Məmmədov da çıxışında keçmiş sovet ordusunun 33 il əvvəl dinc və silahsız vətəndaşlarımıza qarşı görünməmiş qətliam törətdiyini xatırladaraq  vurğulayıb ki, faciə  ilə bağlı həqiqətlərin dünya ictimaiyyətinə çatdırılmasında ümummilli lider Heydər Əliyevin böyük xidmətləri olub. Səfir Ulu Öndərin bütün təzyiqlərə baxmayaraq faciədən bir gün  sonra - yanvarın 21-də ailə üzvləri ilə birlikdə Azərbaycanın Moskvadakı daimi nümayəndəliyinə gələrək sovet hakimiyyətinin qanlı siyasətini ifşa etdiyini və törədilən faciəyə görə məsuliyyəti bilavasitə SSRİ rəhbərliyinin daşıdığını bəyan etdiyini qeyd edərək, 20 yanvar hadisələrinə əsl siyasi-hüquqi qiymətin də məhz Ümummilli Liderin hakimiyyətə qayıdışından sonra verildiyini tarixi faktlarla nəzərə çatdırıb.Azərbaycanın Türkiyədəki səfiri Rəşad Məmmədov çıxışında xüsusi olaraq vurğulayıb ki, sovet totalitar rejimi tərəfindən bəşəriyyət tarixində insanlığa qarşı törədilmiş ən ağır cinayətlərdən biri kimi dəyərləndirilən Qanlı Yanvarın xalqın yaddaşından heç zaman silinməyəcək, faciənin günahsız qurbanları isə daim böyük sevgi və ehtiramla yad olunacaq. Səfir bu gün ölkəmizin müstəqilliyi və ərazi bütövlüyü uğrunda canlarından keçmiş bütün şəhidlərin ruhunun şad olduğunu, Müzəffər Ali Baş Komandan İlham Əliyevin rəhbərliyi ilə qalib Azərbaycan Ordusunun xalqımızın 30 illik həsrətinə son qoyaraq torpaqlarımızı erməni işğalından azad etdiyini vurğulayaraq doğma Qarabağımızda Azərbaycanın üçrəngli bayrağının əbədi dalğalanacağını bildirib. Azərbaycanın Türkiyədəki səfiri Rəşad Məmmədov çıxışında xalqımızın tarixi bağlı həqiqətlərin gələcək nəslə çatdırılmasının vacibliyini də xüsusi olaraq qeyd edib.

Tədbirdə çıxış edən Türkiyə xarici işlər nazirinin müavini Yasin Əkrəm Serim 20 yanvar şəhidlərinin Azərbaycanın müstəqillik əzmini bütün dünyaya nümayiş etdirdiyini vurğulayıb, 20 Yanvar tarixinin 8 Noyabr Vətən müharibəsi zəfərinə gedən yolu açdığını və aydınlatdığını qeyd edib.