Yaponiyanın “ajmedia.jp” portalı Azərbaycan Prezidenti İlham Əliyevin dekabrın 31-də Dünya Azərbaycanlılarının Həmrəyliyi Günü və Yeni il münasibətilə müraciətində səsləndirdiyi xüsusi məqamları geniş işıqlandırıb.

AZƏRTAC xəbər verir ki, yapon və ingilis dilində yayımlanan məlumatlarda Azərbaycan Prezidentinin yola salmaqda olduğumuz 2022-ci ildə əldə etdiyi uğurları xüsusi vurğuladığı qeyd edilib. Dövlətimizin başçısına istinadla Azərbaycanın ötən il dünyanın enerji təhlükəsizliyində rolunun artdığı, ölkəmizin bərpaolunan enerji mənbələrinin bu işdə xüsusi əhəmiyyət kəsb etdiyi, işğaldan azad edilmiş ərazilərlə bağlı Böyük qayıdış proqramının uğurla icra edildiyi, bu işdə Azərbaycanın yalnız öz gücünə arxalandığı, eyni zamanda Ermənistanın istəyindən asılı olmayaraq Zəngəzur dəhlizinin açılacağı vurğulanıb.

Qeyd edilib ki, müharibədən ötən iki ildə Azərbaycan öz hərbi potensialını daha da artıraraq, regionun ən qüdrətli dövlətinə çevrilib. Bu, ölkəmizin əldə etdiyi qələbəni siyasi müstəvidə də möhkəmləndirməyə imkan yaradıb.

Məlumatlarda Prezident İlham Əliyevin ötən il Şuşada keçirilmiş Dünya Azərbaycanlılarının Qurultayını tarixi hadisə adlandırdığı da əksini tapıb.