Tədbiri giriş sözü ilə açan muzeyin Aran Regional filialının müdiri, filologiya üzrə fəlsəfə doktoru Yaqut Bahadurqızı Milli təfəkkürümüzün yetişdirdiyi ən önəmli simalardan, ömrünə bir neçə ömrün işini sığdıran Əzizə Cəfərzadənin keşməkeşli həyatından və məhsuldar yaradıcılığının mühüm mərhələlərindən bəhs edib.

 Tədbirdə  Əzizə Cəfərzadənin oğlu Turan İbrahimov, yazıçı, filologiya elmləri doktoru, professor Vaqif Sultanlı, Folklorşünas alim Tacir Səmimi, muzeyin əməkdaşı Ülviyyə Yusifova, filoloq Flora Əliyeva, Elmira Süleymanova,Vaqif Alıyev,Şəfəq Ağayeva  çıxış edərək Əzizə Cəfərzadənin yaradıcılığındakı özəlliklərdən, müəllimlik və  xeyriyyəçilik fəaliyyətindən  bəhs ediblər.

Çıxış edənlər bildiriblər  ki, tanınmış qadın yazıçılarımızdan olan Əzizə Cəfərzadənin yaradıcılığının XX əsr Azərbaycan ədəbiyyatında özünəməxsus yeri var. Çeşidli janrlarda yazmasına baxmayaraq  Azərbaycan ədəbiyyatında daha çox tarixi romanlar müəllifi kimi tanınan Əzizə Cəfərzadə əsərlərində fakt və qaynaqlardan sənətkarlıqla bəhrələnməklə yanaşı, müşahidə olunan güclü bədii təxəyyül yaxın-uzaq keçmişin bilinməzliklərinə güzgü tutur. Eyni zamanda, çıxışlarda qeyd olunmuşdur ki, Əzizə Cəfərzadə  bir tədqiqatçı alim kimi də Azərbaycan elmi qarşısında təqdirəlayiq xidmətlər göstərib. Onun klassik Azərbaycan ədəbiyyatının, xüsusilə də şifahi ədəbi irsimizin öyrənilməsi sahəsində gərgin elmi axtarışlarının bəhrəsi olan əsərləri həmişə elmi ictimaiyyətin marağına səbəb olub. Əzizə xanım ədəbi və elmi yaradıcılığı pedaqoji fəaliyyətlə uğurlu bir şəkildə əlaqələndirməyi bacarıb. O, Bakı Dövlət Universiteti filologiya fakültəsinin professoru kimi uzun illər Azərbaycanda elmi kadrların hazırlanması işinə layiqli töhfə verib.

Tədbir zamanı Xalq yazıçısı Əzizə Cəfərzadənin həyat və yaradıcılığını əks etdirən videoslayd , haqqında  Aztelefilmin çəkdiyi filmdən epizodlar nümayiş etdirilib.

Tədbirin musiqili qonaqları muğam bilicisi, ustad sənətkar Ağakərim Nafiz, tanınmış xanəndə Səfalı Əliyev, balaban ustası Əməkdar Mədəniyyət işçisi Rasim Ələsgərov və aşıq Babək Şakirli maraqlı ifaları ilə məclisə rövnəq veriblər.

Sonda görkəmli ədibin oğlu, onun irsinin qorunub saxlanmasında böyük xidmətləri olan Turan İbrahimov anası ilə bağlı xatirələrindən, yaratdığı ev muzeyindən danışıb və  Əzizə Cəfərzadənin yeni nəşrdən çıxmış 25 nüsxədən ibarət kitabını muzeyə hədiyyə etdi. O, tədbirin təşkilinə görə Ədəbiyyat muzeyinin kollektivinə təşəkkürünü bildirib.