Bunu “Səs” İnformasiya Agentliyinə açıqlamasında Hüquqi və Demokratik İslahatlara Mərkəzi İctimai Birliyinin sədri İlham Əliyev bildirib. Onun sözlərinə görə, Fransa beynəlxalq aləmdə separatçılara dəstək verən, terrorçularla eyni mövqedən çıxış edən dövlət olaraq tanınıb: “Çünki özü də insanlığa qarşı qətliamlar törədib. Fransa 1835 və 1875-ci ildə Əlcəzairdə 2.5 milyon, Tunisdə 1 milyon dinc insanı qətlə yetirib. 1994-cü ildə "Ruanda soyqırımı"nı həyata keçirməklə 100 mindən çox insanın həyatına son qoyub”.

HDİM sədri əminliklə bildirdi ki, Fransa Senatının Azərbaycan əleyhinə qətnaməsi əsassız və məntiqsizdir, həm də siyasi əxlaqa ziddir: “Fransa dövlət rəhbərliyi Azərbaycanla Ermənistan arasında münasibətlərin normallaşması prosesində fəal iştirak etmək niyyətini bəyan etsə də, separatçı qətnaməsi ilə reallıqdan uzaq siyasət yürütdüyünü nümayiş etdirdi. Ermənipərəst senator Brüno Rötayo və onun bir neçə həmkarının təklif etdiyi qətnamə layihəsinin qəbul edilməsi Fransanın dünyada sifarişlərə və göstərişlərə uyğun siyasət yürütdüyünü göstərir. Bu ölkədən heç zaman ədalətli mövqe gözləmək olmaz. Necə ki, 30 il ərzində ATƏT-in Minsk Qrupunun üzvü kimi Qarabağ münaqişəsinin həllində ədalətli mövqe sərgiləmədi, hər zaman erməni maraqlarına xidmət etməyə, münaqişənin uzanmasına çalışdı. Azərbaycan isə uzun müddət səbr edə bilməzdi. 44 günlük Vətən Müharibəsi ilə işğala son qoydu və ərazi bütövlüyünü bərpa etdi. Bundan sonra Fransaya haqlı olaraq inanmaq olmaz və bu dövlətin ifşası üçün hər bir azərbaycanlı fəal iş aparmalıdır”.