Kitab Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin “Şuşa İli” qrant layihəsi əsasında Azərbaycan və rus dillərində işıq üzü görüb. Kitabın elmi redaktoru, Əməkdar mədəniyyət işçisi, Azərbaycan Milli Kulinariya Assosiasiyasının (AMKA) rəhbəri Tahir Əmiraslanovdur.

İrəvan, Naxçıvan, Təbriz mətbəxi haqqında kitabların müəllifi olduğunu deyən Tahir Əmiraslanov yeni çap olunan “Qarabağ mətbəxinin inciləri” haqqında məlumat verib və nəşrin böyük maraqla qarşılanacağına əminliyini ifadə edib.

Kitabın ərsəyə gəlməsində əziyyəti olan, nəşrin həmmüəlliflərinə təşəkkürünü bildirərək onları diplomlarla mükafatlandırıb.

“Biz Qarabağı almasaydıq bu kitabın təqdimatını da keçirə bilməzdik. Buna görə də ən böyük təşəkkür Ali Baş Komandan İlham Əliyevə düşür, çünki məhz onun və Birinci vitse-prezident Mehriban Əliyevanın sayəsində biz Qarabağ mətbəxini dünyada təbliğ edirik”, - deyə Tahir Əmiraslanov vurğulayıb.

Bildirib ki, yaxın günlərdə Türkiyədə də sözügedən kitabının təqdimatı olacaq.

Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin icraçı direktoru və kitabın “Ön söz” müəllifi Aygün Əliyeva deyib: “İki ildir ki, Qarabağ sevincini qəlbimizdə daşıyırıq. “Şuşa İli” elan olunandan sonra biz də QHT-lərə dəstək məqsədilə qrant müsabiqəsi elan etdik. Müsabiqəyə 200-dən çox bir-birindən maraqlı layihələr daxil oldu. Qaliblər sırasında “Qarabağ mətbəxinin inciləri” kitabı da yer alıb. Mətbəx mədəniyyətin ayrılmaz bir hissəsidir və onda həmin xalqın irsinə, adət-ənənələrinə məxsus gizli kodlar var. Biz mətbəximizi qorumaqla mədəniyyətimizin ayrılmaz bir hissəsini qorumuş oluruq. Qarabağ işğal olunanda sanki mədəniyyətimiz işğal olunmuşdu. Qarabağa qayıdan azərbaycanlı əslində mədəniyyətimizi geriyə qaytardı. Analarımızın əllərinin duzu, çörəyi, biş-düşü qayıtdı”.

Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin (AGADMC) sədri, fəlsəfə doktoru İlqar Orucov bildirib ki, Tahir Əmiraslanov elm və mədəniyyətin təşviqi ilə məşğul olduğu üçün onun bu addımını Azərbaycan xalqının uğuru hesab edir: “Mətbəximizi təbliğ etmək, dünyaya çıxarmaq bizim vətəndaşlıq borcumuzdur. “Qarabağ mətbəxinin inciləri” kitabı Tahir Əmiraslanovun ən önəmli layihəsidir. Bu kitab hər bir azərbaycanlının evində olmalıdır, çünki indi üzərimizə düşən vəzifə mətbəximizi yaşatmaq və zənginləşdirməkdir”.

Tədbirdə Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı, AMEA-nın Arxeologiya, Etnoqrafiya və Antropologiya İnstitutunun şöbə müdiri, tarix elmləri doktoru İlhamə Məmmədova və digər qonaqlar çıxış edərək “Qarabağ mətbəxinin inciləri” kitabının əhəmiyyətindən danışıb və yeni nəşrin müəlliflərinə və ərsəyə gəlməsində əməyi olanlara təşəkkürlərini bildiriblər.

Diqqətə çatdırılıb ki, Tahir Əmiraslanov nəinki Azərbaycanda, həmçinin bütün dünyada dövrün ən böyük kulinarlarından biri kimi tanınır. Onun budəfəki kitabı çox ağır və samballı mənbə kimi Azərbaycan mədəniyyətinin ağır artileriyasıdır. Çıxışçılar Tahir Əmiraslanova təşəkkür edib və ona yeni-yeni uğurlar arzulayıblar.

Sonda Tahir Əmiraslanov kitabları imzalayaraq qonaqlara hədiyyə edib.

Qeyd edək ki, kitabın ilk təqdimatı Şuşa şəhərində “N” saylı hərbi hissədə keçirilib.