Ölkəmizin əzəli torpaqlarının işğaldan azad edilməsi uğrunda 44 günlük Vətən müharibəsində müqəddəs şəhidlik zirvəsinə ucalmış igid əsgər və zabitlərimizin oğul itkisi ilə üzləşən, amma məğrurluğunu itirməyən analarının qəhrəman övladları haqqında ürək sözlərindən, duyğu və düşüncələrindən, şirin və kədərli xatirələrindən ibarət “Başını uca tut, şəhid anası” adlı kitab işıq üzü görüb. 

Əsas məqsədi şəhid analarının övladları ilə bağlı xatirələrini geniş oxucu kütləsinə çatdırmaqla müharibə şəhidlərinin qəhrəmanlığının təbliğ edilməsindən, gənclərin vətənpərvərlik ruhunda tərbiyə olunmasına dəstək verilməsindən ibarət olan layihə çərçivəsində ərsəyə gəlmiş kitabın özəlliyi onun müəlliflərinin məhz şəhid analarının özlərinin olmasıdır. Tərtibçi anaların təqdim etdikləri oçerkləri oxuculara olduğu kimi çatdırmağa çalışıb, Vətən sevgisi ilə canını qurban vermiş 22 şəhidin hər biri haqqında qısa məlumatları rus və ingilis dillərində təqdim edib. 

Hər bir yazının başlığı da anaların mətndə işlətdikləri ifadələrdir. Kitabın “Ön söz”ündə deyilir: “Narahat olma, anacan. Mən Qələbə ilə qayıdacağam...” – deyib cəbhəyə yola düşmüş oğul Vətənin rəmzi olan üçrəngli bayrağa bürünüb döyüş dostlarının çiynində qayıtdı. Qalib kimi qayıtdı... Canını Qələbə uğrunda qurban verib qayıtdı. Bu qayıdışı ilə xalqına, ailəsinə və ilk növbədə onu dünyaya gətirmiş anasına dünya boyda qürur yaşatdı”. Nəşrin tərtib edildiyi dövrdə layihə rəhbəri və icraçılar müxtəlif bölgələrdə yaşayan şəhid ailələrini ziyarət edib, igid oğulların doğmaları ilə görüşüb, anaları ilə həmsöhbət olublar. Oğul itkisindən gözlərinin yaşı qurumasa da, övladının mərdliyindən qürur duyduqca qaməti əyilməyən, məğrurluğunu itirməyən hər bir şəhid anasının ürək sözləri, xatirələri və nəsihətləri, eləcə də ailə albomundan təqdim etdikləri fotoşəkillər kitabın həm məzmunca dolğun, həm də forma baxımından nəfis tərtib edilməsinə imkan yaradıb.  

“Şəhidlərin xatirəsini əziz tutub bu layihəni gerçəkləşdirməklə doğma övladlarını itirmiş analara təsəlli verməyə, müharibədən əziyyət çəkmiş qadınlara sosioloji-psixoloji, mənəvi dəstək göstərməyə, ailə dəyərlərini təbliğ etməyə və gənc nəslə vətənpərvərlik hissinin aşılanmasına xidmət göstərməyə çalışdıq.... 

Şəhidlərimiz – qürur mənbəyimizdir. Onlarla hər birimiz fəxr edirik. Bu hissə sahib olmağa daha çox onların doğmalarının, ilk növbədə analarının haqqı var. Məhz şəhid anaları qəhrəman oğullarını təkcə öz övladları kimi deyil, bütün xalqın, Ana Vətənin övladları kimi böyütmüşlər. Var olsunlar!.. Nə qədər çətin də olsa, öz övladları haqqında fikirlərini bizimlə bölüşdüklərinə görə hər bir şəhid anasına qəlbən minnətdarıq”. 

Ruhiyyə Məmmədova

“Ahıllara və Tənhalara Dəstək” İctimai Birliyinin sədri