Şairə Rəfiqə İsaqqızının müəllifi olduğu “Zülmətdən doğan günəş” adlı kitab Vətən müharibəsi zamanı düşmənin kabusuna çevrilən, 3 düşmən postunu alaraq qarşı tərəfin 24 xüsusi təyinatlısını məhv edən, torpaqlarımızın azad olunması uğrunda qəhrəmancasına döyüşən şəhid mayor Rüfət Əsgərovun əziz xatirəsinə həsr olunub.

Tədbirdə şəhidin ailə üzvləri, yaxınları, qazilər, Müdafiə Nazirliyi və Heydər Əliyev adına Ali Hərbi məktəbin əməkdaşları, DOST İnklüziv İnkişaf və Yaradıcılıq mərkəzinin könüllüləri, eləcə də “Böyük Qayıdış” Gənclər Təşkilatı İctimai Birliyinin nümayəndələri, həmçinin digər qonaqlar iştirak ediblər.

Şəhid mayor Rüfət Əsgərovun atası Mürvət Əsgərov, yaxın dostu polkovnik leytenant Rüfət Məmmədov, “Zülmətdən doğan günəş” adlı kitabın müəllifi şairə Rəfiqə İsaqqızı, Vətən müharibəsi qaziləri Natiq Mikayılov və Aşur Gülqəzov çıxış edərək Vətən müharibəsində öz şücaəti ilə seçilən şəhid mayor Rüfət Əsgərovla bağlı xatirələrini bölüşüblər. Qeyd olunub ki, Azərbaycanın ərazi bütövlüyü və suverenliyi uğrunda şəhidlik zirvəsinə ucalanların xatirəsini yaşatmaq, onların qəhrəmanlığını gələcək nəsillərə nümunə göstərmək hər birimizin borcudur: “Bu məqsədlə Vətən, torpaq uğrunda şəhid olanların keçdiyi döyüş yolundan bəhs edən filmlərin çəkilməsi, şəhidlərimizin qəhrəmanlıqlarını yazılı tarixə çevirmək və onu yeni nəslə konkret faktlarla çatdırmaq üçün bir çox kitabların yazılması böyük əhəmiyyət kəsb edir”.

Sonda tədbir iştirakçıları mayor Rüfət Əsgərova məxsus, muzeyin fondlarında qorunub saxlanılan müxtəlif şəxsi əşyaların-hərbi formaların, sənədlərin, fotoşəkillərin nümayiş olunduğu sərgi ilə tanış olublar.