Azərbaycan əraziləri işğaldan azad edildikdən sonra beynəlxalq ictimaiyyət erməni cinayətlərini gördü, vandalizminin şahidi oldu. 30 il ərzində Azərbaycanın bar-bar bağırdığı, dünyanın isə görməzdən gəldiyi faktlar nəhayət ki işıq üzünə çıxdı. Və artıq dünya görmək məcburiyyətindədir. Görünən mənzərə isə odur ki, ermənilər işğal etdikləri Azərbaycan torpaqlarında təkcə insanlara qarşı deyil, həm də dini, milli abidələrə, təbiətə, bir sözlə gözlə görülən hər şeyə qarşı vəhşilik törədiblər. Bu məqam ABŞ Dövlət Departamentinin dünyada dini etiqad azadlığının vəziyyəti ilə bağlı 2021-ci il üçün illik hesabatında da öz əksini tapıb. Hesabatda bildirilir ki, işğal dövründə Azərbaycanın yüzlərlə məscidi, ziyarətgahı, qəbiristanlığı talan edilib, dağıdılıb və təhqir olunub. Ağdamda, Füzulidə, Cəbrayılda, Zəngilanda azərbaycanlılara məxsus məzarlıqlar sistemli şəkildə ağır tikinti texnikası ilə məhv edilib, qəbir daşları zədələnib, insan qalıqlarının ekshumasiyası izləri aşkar edilib. Hətta azərbaycanlılara məxsus qəbirlərdə cəsədlərin qızıl dişləri çıxarılıb. İşğal dövründə ərazilərin genişmiqyaslı şəkildə minalanması yüzlərlə dini məkana girişi mümkünsüz vəziyyətə gətirib. Füzuli rayonunda XIX əsrə aid Hacı Ələkbər məscidi dağıdılıb və təhqir edilib, Ağdamdakı Cümə məscidinin mehrabı güllələnib, həmçinin, bu rayondakı bütün qəbiristanlıqlar təhqir və talan edilib, dağıdılıb. Dağıdılan dini abidələr arasında İmarət Qərvənd qəbiristanlığında XVIII əsrə aid müqəddəs məzarlar və şəhərdəki Şəhidlər xiyabanı da var.

Bütün bunların qeyd olunduğu hesabatda Ağdamdakı Şəhidlər xiyabanını ziyarət etmiş Qərb diplomatlarının vandalizmi canlı şəkildə gördüyü bildirilir.