Gəlimli-gedimli dünyada hər kəs bir iz qoyub gedir. Eldar SƏfA ŞAHVƏLƏDLİ hər zaman sözə həm sədaqətli, həm də yaradıcılığında ilahi eşqə vurğun idi. Onun poeziyasında ruhani yanaşma, ilahi bağlılıq mühüm istiqamətlərdən biri olub.

Eldar müəllim Azərbaycan Yazıçılar Birliyinin üzvü, bir sıra kitabların müəllifi, ən əsası yaradıcılığa ilahi kontektsdən yanaşan söz adam idi. O, yaradıcılıqla bərabər pedaqoji sahədə uzun illər fəaliyyət göstərib və hər bir şəxsin inkişafında yüksək təhsilin zəruri olduğunu cəmiyyətə təlqin edib.

Eldar Səfa Şahvələdli sözə ürək verərək yazırdı...

Əbədi və ədəbi aləmdə söz qədər söz, söz qədər səs, söz qədər müqəddəs, söz qədər baha, söz qədər tutumlu, söz qədər rəzil, söz qədər əzəl, söz qədər təzə-tər,.. söz qədər köhnə və qədim heç nə ola bilməz. Söz Sözü çəkər, Söz Sözü əkər. Söz sözdən çəkər... Hər sözün öz ömrü, öz taleyi, öz məşəqqəti, öz səhəri, öz zəhəri, zülməti var; əbədi ömürlüsü də çoxdur, az ömürlüsü - ömrü gödək olan da az deyil. Sözü sözsüz anlayanda xoş olur, ovqatın da, eynin də saz olur, xiridar əlinə düşməyəndə naxoş və nasaz olur. Anlaqlı olanda söz səninlə, sən də sözlə yaşayırsan. Sözün namın çəkirsən, sözü qoruyursan, sözü daşıya bilirsən.

Eldar müəllim poeziyada sözə belə dəyər verib:

Söz mənim,mən sözün tacıdarıyam

Haqq sözə sehirə daxıl kimiyəm.

Sözün xırmanında bitən darıyam

Sözü sehr olana paxıl kimiyəm.

Sözüm qəribliyə düşsə, çifayda,

Yad olar özümə yaraşığım da.

Sözümün sehrindən iblis lal olar

Düşər əllərindən şər qaşığı da.

Nə ulduz qalıbdı, nə də ki zirvə,

Zirvə şəhidinə, taxt qazısına...

Aldanıb dünyanın yükünə girmə

Döndərər bir ömrü yer yazısına.

Sünbülüm dən tutar təbəssümündən,

Mən şuma atılmış taxıl kimiyəm.

Qopmuşam dünyanın sarı simindən,

Sözü sehr olana paxıl kimiyəm.

Allah rəhmət eləsin Eldar Səfa Şahvələdliyə. Məkanı cənnət olsun.

Fact-info.az