Tədbirdə dövlət rəsmiləri, ədəbiyyat, mədəniyyət və media nümayəndələri iştirak edib.

Tədbirin aparıcısı, Azərbaycan İstiqlal Muzeyinin direktoru Sədi Mirseyibli bildirdi ki, kitab-albom Əli bəy Hüseynzadənin qızı Feyzavər Turanın Azərbaycan Respublikası Mədəniyyət Nazirliyinə – Azərbaycan İstiqlal Muzeyinə hədiyyə etdiyi, şəxsi təşəbbüsü ilə atasına, qardaşına və özünə məxsus 161 ədəd maddi mədəniyyət nümunəsindən ibarət kolleksiyanı əhatə edir.

Tədbirdə  MİMTA Fondunun icraçı direktoru Pərviz Əmirov çıxış edərək bildirib ki: “Əli bəyin bu kitab-albomda bizlərə təqdim olunan şəxsi əşyalarına baxarkən biz bir daha o böyük mütəfəkkirin nə qədər kübar, alicənab və milli mənsubiyyətinə yüksək dəyər verən şəxsiyyət olduğunu görürük. İnanıram ki, MİMTA Fondunun və Azərbaycan İstiqlal Muzeyinin birgə layihəsi əsasında çap olunmuş bu nəfis kitab Əli bəyin həyat və fəaliyyətini araşdıranlar üçün faydalı bir tədqiqat materialı olacaqdır”. 

Daha sonra Bakı Yunus Emre İnstitutunun müdiri Selçuk Karakılıç çıxış edib. O, hər iki ölkənin ədəbi nümayəndələrini yada salıb, eyni zamanda Əli bəy Hüseynzadənin yaşadığı dövrə nəzər salıb və onun ədəbi yaradıcılığının vacibliyini vurğulayıb.

Həmçinin “Füyuzat” jurnalının baş redaktoru Mübariz Yunus bildirdi ki, kitab-albom “Füyuzat” dərgisinin 15 illiyinə gözəl töhfədir: “Bu kitab-albomda XIX əsrin sonu – XX əsrin əvvəllərində Azərbaycanın böyük mütəfəkkiri, milli məfkurənin yaranmasında, milli maarifçilik hərəkatının tərəqqisində böyük xidmətləri olan Əli bəy Hüseynzadənin mirası toplanmışdır. İnanırıq ki, bu kitab xalqımız və ziyalılarımız tərəfindən rəğbətlə qarşılanacaq”.

Həmçinin tədbirdə bir çox ziyalılara çıxış edib. Əli bəy Hüseynzadənin Azərbaycan milli məfkurəsinin formalaşmasında böyük rolundan bəhs etdilər, Əli bəy irsinin tədqiqi, təbliği və gələcək nəsillərə çatdırılması baxımından kitab-albom Azərbaycan mədəniyyətinə və elminə gözəl töhfə olduğunu bildirdilər.

Afaq Rza (525.az)