2016-cı ilin Aprel döyüşləri Ermənistan ordusunun məğlubedilməzlik mifini puç etdi və 2020-ci ildəki möhtəşəm Qələbəmizin əsasını qoymuş oldu.

Bu fikirləri AZƏRTAC-a açıqlamasında Milli Məclisin deputatı Səbinə Xasayeva bildirib.

S.Xasayevanın sözlərinə görə, Aprel döyüşlərində Azərbaycan Ordusu neçə-neçə strateji əhəmiyyətli yüksəkliyi, 2000 hektardan çox ərazini işğaldan azad edib. Döyüşlərin səhəri günü Lələtəpənin yanındakı qəbiristanlıqda 24 ildən sonra Yasin oxundu. Bu səs ruhun cana qayıdışı idi.

“2016-cı ilin Aprel döyüşləri Azərbaycan əsgərinin döyüş əzmini, qələbə ruhunu kükrətdi. Aprel döyüşlərində qələbə qazananların hərbçi-vətəndaşlıq missiyasını 2020-ci ilin payızında Vətən müharibəsi iştirakçıları Zəfərlə tamamladı. Bu Zəfər Müzəffər Ali Baş Komandanın sərkərdəlik qüdrətinin Zəfəri idi, xalqın orduya inamının Zəfəri idi”, - deyə S.Xasayeva vurğulayıb.

Deputat bildirib ki, Aprel döyüşləri haqqında çox danışmaq olar: “Prezident, Müzəffər Ali Baş Komandan İlham Əliyevin vurğuladığı kimi, Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir.

Bu döyüşlər Azərbaycan xalqının və dövlətinin heç vaxt işğalla barışmayacağını göstərdi. Azərbaycan öz ərazi bütövlüyünü nəyin bahasına olursa-olsun bərpa edəcəyini bu döyüşlərdə düşmənə bir daha bəyan etdi.

Aprel döyüşlərindən 4 il sonra Azərbaycan Ordusu tarix yazaraq öz ərazi bütövlüyünü təmin etdi”, - deyə S.Xasayeva qeyd edib.