O deyib: “Tez-tez Türkiyədə olan, burada təqdim edilən hesabatda adı çəkilən bölgələri birbaşa görən biri kimi bildirmək istəyirəm ki, Avropa terrorla mübarizə məsələsində Türkiyəyə kifayət qədər dəstək vermir. Hətta bəzi Avropa ölkələrində Türkiyə əleyhinə çalışan, Türkiyədə terror aktları törədən, terror təşkilatına açıq və ya gizli dəstək verən qrupları və onların əməllərini böyük üzüntü ilə izləyirik. Terror hər şeydən öncə insanlıq əleyhinə cinayətdir. İndi müzakirə etdiyimiz məruzədə də Türkiyədə fəaliyyət göstərən və son 40 ildə 30 mindən artıq insanın həyatını itirməsinə səbəb olmuş bir terror təşkilatına da açıq şəkildə “terror təşkilatı” deyilməsi vacibdir. Bu mövzuda ikili standartlara yol verilməməlidir”.
Qənirə Paşayeva qeyd edib ki, AŞPA-ya üzv ölkələr yarım əsrə yaxındır terrorla mübarizə aparan Türkiyəyə bu haqlı mübarizəsində daha çox dəstək verməlidir. Məruzədə qeyd olunduğu kimi, Türkiyədə sadəcə son bir neçə ay ərzində terrorla mübarizədə 458 təhlükəsizlik əməkdaşı həyatını itirib, 3321 nəfər yaralanıb. O, Türkiyənin müxtəlif bölgələrində bir çox şəhid ailələri ilə görüşdüyünü bildirib. Bu görüşlər əsnasında terror qurbanlarının yaxınlarının AŞPA da daxil olmaqla, bir çox Avropa qurumlarına qarşı inamlarının itməsinin şahidi olduğunu vurğulayıb. O insanlar Avropanın Türkiyəyə qarşı ikili standartlar tətbiq etdiyini düşünürlər. Bu gün AŞPA-nın buradan “Terrora qarşı hər zaman Türkiyənin yanındayıq” mesajını verməsi zəruridir. Hazırlanan hesabatda PKK terror təşkilatına silahı buraxmaq çağırışı var. Biz bu çağırışı alqışlayırıq. Amma bununla kifayətlənmək olmaz. Terror təşkilatına təzyiq göstərilməlidir. Bu təşkilatlar silahları haradan alırlar? Türkiyənin terrorla mübarizədə keçirdiyi əməliyyatlarda terror təşkilatından ələ keçirilən silahlar əslində bizə çox şey söyləyir. Biz terror təşkilatına silah, maliyyə və siyasi dəstək verənlərə də çağırış etməliyik ki, terrorizmi dəstəkləməkdən əl çəkmək lazımdır. Terrora dəstək verən insanlara, qruplara heç bir şəkildə haqq verilə bilməz. Terrora açıq və ya gizli dəstək verənlərin ədalət qarşısında hesab verməsi üçün birlikdə çalışmalıyıq. Bu məsələdə ikili standartlara yer olmamalıdır. Əks təqdirdə dünyadakı terror hadisələri daha da artacaq, insanlığı və mədəniyyətimizi təhdid edən hala gələcək. Hesabatda adı çəkilən bölgələrdən biri olan Diyarbəkirdə 2016-cı il mayın 28-də 558 milyon türk lirəsinə başa gələn 116 layihənin birlikdə açılışının keçirilməsi, eynı zamanda, qeyd edilən digər bölgələrə qoyulan sərmayələr, Türkiyə dövlətinin heç bir etnik ayrı-seçkiliyə yol vermədən bütün vətəndaşlarına bərabər şəkildə sahib çıxdığının göstəricisidir. Türkiyədə olan hər kəs bilir ki, türk xalqı ilə kürd xalqı arasında heç bir problem yoxdur. Onlar yüz illərlə bərabər yaşayıblar. Hər kəs çox gözəl bilir ki, Türkiyə dövlətinin də kürd xalqı ilə heç bir problemi yoxdur. Bu problemi yaratmaq istəyən terror təşkilatları və bəzi xarici qüvvələr var. Bunu çox dəqiq görməli və Türkiyənin terrorla mübarizəsinə daha böyük dəstək verməliyik. (AZƏRTAC)