Azərbaycan Respublikasının QHT-yə Dövlət Dəstəyi Agentliyinin dəstəyi ilə Sosial Rifah və Tədqiqatlar İctimai Birliyi “Zəfər tariximizə postmüharibə dövründə Vətəndaş Cəmiyyətinin töhfəsi” layihəsini həyata keçirir. Layihə çərçivəsində "Şəhidlər ölməz-Vətən bölünməz" kitabının mövzusuna uyğun olaraq Xəzər rayonu ərazisində 25 Şəhidimiz haqqında məlumatlar toplayırıq. Bu dəfə şərəfli döyüş yolu keçən Şəhid komandir Habil Cahangirli haqqında söhbət açırıq. Belə zirvələrə ucalanlardan biri Cahangirli Habil Həzər oğludur.

O, 1980-ci ildə Lerik rayonun Veri kəndində anadan olub. İki bacı, on bir qardaş olan böyük bir ailənin bir üzvü Habil idi. 1997-2001-ci illərdə BDU-da təhsil alan Habil sonradan zabit kimi sərhəd qoşunlarında xidmət edir. 2004-cü ildən leytenant kimi ehtiyata buraxılır. 2009-cu ildə ailə həyatı qurur. 2 övladı dünyaya gəlib. Ailə üzvlərinin verdiyi məlumata görə, ilk baxışda sərt xarakterli insan təsəvvürü yaradan Habil insanlara, xüsusilə, öz uşaqlarına qarşı çox mehriban, qayğıkeş olub. Ona müraciət edilən istənilən məsələ ilə bağlı Habil heç kimi ümidsiz yola salmazdı.

Şəhidimizin həyat yoldaşı Günel xanım fikirlərini belə açıqlayıb: “Habil gözəl ailə başçısı olmaqla yanaşı çox səxavətli insan idi. Allah ona bütün müsbət keyfiyyətləri vermişdi. Onda Vətənə, torpağa bağlılıq necə olubsa, ailəyə də bağlılıq elə möhkəm idi. O, ailəsi ilə birlikdə gəzməyi, səfərlərə çıxmağı çox xoşlayırdı. İki övladımız 11 yaşlı Fərid, 7 yaşlı qızımız var. Nə qədər çətin olsa da bu gün onlar atalarının keçdiyi şərəfli döyüş yolu ilə fəxr edirlər. Atası oğlumuza polis, qızımıza həkim olmağı tövsiyə edirdi. Bu gün mən baxıram övladlarımız çox səylə çalışırlar. Əvvəl atalarının yoxluğu ilə barışmırdılar. Bu gün artıq baxıram bu, uşaqlar öz atalarının həyat hekayətini eşidəndə, məktəbdə onun şəklini görəndə qürur hissi keçirirlər. Mən də çalışıram övladlarımız atalarının adına layiq böyüsünlər. Onu da deyim ki Habil uşaqlara hər zaman deyirdi ki, heç bir çətinliyin qarşısında əyilməyin. Hər hansı hadisə baş versə çətinliyin qarşısına dik çıxmaq lazımdır. Görünür, atalarının bu tövsiyəsi uşaqlarının köməyinə çatır”.

Xəzər rayonu Binə qəsəbəsində yaşayan Habil 2020-ci ilin sentyabrın 27-də başlayan II Qarabağ müharibəsinə zabit kimi yollanır. O, Füzulinin, Xocavəndin azad olunmasında zabit kimi böyük fədakarlıqlar göstərir. Şərəfli döyüş yolu keçən Cahangirli Habil Şuşaya qədər gedib çıxır. Xocavəndin, Füzulinin azad olunmasına görə, medallarla təltif olunur. Binə qəsəbəsində Şəhidlər Xiyabanında Habil dəfn olunub.

Onun iki övladının, qohumlarının, ailə üzvlərinin və onu tanıyanların and yerinə çevrilən bu müqəddəs xiyaban, Binə Şəhidlər Xiyabanı həm də böyük tariximizə, 30 il gözlədiyimiz Zəfərimizə şahidlik edir. Ziyarətçilərin təskinlik məbədinə çevrilən ölkə ərazisindəki bu məzarlıqlarda dolaşan ruhlar sakitlik tapıblar. Ona görə, Şəhidlərimizin ruhları rahatlıq tapır ki, Zəfər, Qarabağ, Şuşa bizim oldu!

Fact-info.az