Tariximizə qızıl hərflərlə yazılmış Vətən müharibəsində düşmən üzərində qələbə naminə sağlamlığını itirmiş əsgər və zabitlərimizə xüsusi diqqət və qayğı ilə yanaşmaq vətəndaş cəmiyyətini təmsil edən hər bir kəsin borcudur. Dünya Azərbaycanlılarının Həmrəyliyi Günü və Yeni il bayramı ərəfəsində “Ahıllara və Tənhalara Dəstək” İctimai Birliyinin təşkilatçılığı, Bakı Slavyan Universitetinin nəzdində Sosial-Psixoloji Xidmət Mərkəzinin rəhbəri dosent Gülnarə Həsənovanın, “İnci Company” şirkəti və “Naxçıvanlılar qrupu” təşkilatının dəstəyi ilə paytaxtın “Bizim məkan” ailəvi restoranında qəhrəman Vətən övladları – qazilər üçün bayram tədbiri keçirilib.

Dövlət himni səsləndirildikdən sonra tədbir iştirakçıları şəhidlik zirvəsinə ucalmış igid əsgər və zabitlərimizin əziz xatirəsini bir dəqiqəlik sükutla yad ediblər. Qaziləri salamlayan “Ahıllara və Tənhalara Dəstək” İctimai Birliyinin sədri Ruhiyyə Məmmədova düşmən üzərində böyük Qələbənin Ali Baş Komandanın qətiyyətindən, hərbiçilərin rəşadətindən və xalqımızın həmrəyliyindən qaynaqlandığını vurğulayaraq, qaziləri bayramlar münasibətilə təbrik edib, tədbirin keçirilməsinə dəstək göstərən qurumlara və “Bizim məkan” kollektivinə təşəkkürünü bildirib.

Əzəl torpaqlarımızın işğaldan azad edilməsi uğrunda qanlı döyüşlərdə sağlamlığını itirmiş qazilər müharibə günləri ilə bağlı xatirələrini bölüşüb, dərin minnətdarlıq hissi ilə onlara göstərilən dövlət qayğısından danışıblar. Xalqımızın birliyi və həmrəyliyinin qələbəni şərtləndirən mühüm amillərdən biri olduğunu vurğulayan əsgər və zabitlər bu gün də sülh və əmin-amanlıq, haqq və ədalət uğrunda canlarından keçməyə hazır olduqlarını bildiriblər. Tədbirin sonunda qazı ailələrinə bayram sovqatları, övladlarına hədiyyələr təqdim olunub.

Ruhiyyə Məmmədova

“Ahıllara və Tənhalara Dəstək” İctimai Birliyinin sədri