Türkdilli ölkələrin kinematoqrafçılarının, eləcə də aktyorlarının yüksək peşəkarlığını görmək sevindiricidir. Hər ölkə burada öz tarixini, özünəməxsus xüsusiyyətlərini nümayiş etdirdi. Bütün bu insanları birləşdirən isə sülh tərəfdarı olmalarıdır. Bütün doğma türkdilli ölkələri bu gözəl kino, dostluq, qarşılıqlı anlaşma bayramı münasibətilə təbrik etmək istəyirəm. Bizi ortaq tarix, bu gün və gələcək birləşdirir.

Bu fikirləri İstanbulda keçirilən birinci “Korkut Ata” Türk Dünyası Film Festivalı çərçivəsində mediaya açıqlamasında Qazaxıstanın mədəniyyət və idman naziri Aktota Rayımkulova bildirib.

Festival çərçivəsində beş ölkənin mədəniyyət nazirləri tərəfindən imzalanan bəyannamə haqqında danışan Qazaxıstan naziri deyib: “Bu sənəd bizim bundan sonra da davam edəcək əməkdaşlığımızın göstəricisidir. Sənəddə bu festivalın hər il keçiriləcəyi də bildirilir. Festivalın 2022-ci ildə Türkiyənin Bursa şəhərində, 2023-cü ildə isə Azərbaycan tərəfindən Şuşada keçirilməsi nəzərdə tutulur. Qazaxıstan olaraq biz də öz növbəmizdə 2024-cü ildə festivalın ölkəmizdə keçirilməsini planlaşdırırıq. Şəhər barədə hələ ki, qərar verilməyib. Bu, türkdilli ölkələrin mənəvi paytaxtı olan Türkistan və ya Qazaxıstanın paytaxtı Nur-Sultan ola bilər. Bildiyim qədər 2025-ci ildə isə Özbəkistanda keçirilməsi nəzərdə tutulur”.