Bu gün ictimai-siyasi həyatın elə bir sahəsi yoxdur ki, orada böyük öndər Heydər Əliyevin silinməz, parlaq izi olmasın. Ulu Öndərin Azərbaycan ədəbiyyatı və mədəniyyətinə də göstərdiyi diqqət onun yorulmaz fəaliyyətinin nəzəri xüsusi cəlb edən və ayrıca araşdırılmağa layiq olan istiqamətlərindəndir.

AZƏRTAC xəbər verir ki, bu fikirlər mayın 10-da Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyində keçirilmiş “Ədəbi abidələrimizin və əbədi ədiblərimizin böyük hamisi – Heydər Əliyev” mövzusunda elmi sessiyada səsləndirilib.

Tədbirdə muzeyin direktoru, akademik Rafael Hüseynov Ulu Öndərin xalqımızın mənəvi sərvətlərinin qorunması və təbliği sahəsindəki müstəsna xidmətlərindən söz açıb. Ümummilli Liderin muzeyə həmişə xüsusi qayğı ilə yanaşdığını söyləyən akademik R.Hüseynov ötən əsrin 90-cı illərinin əvvəllərində Azərbaycana yenidən qayıdışından sonra onun ilk ziyarət etdiyi yerlərdən birinin Milli Azərbaycan Ədəbiyyatı Muzeyi olduğunu söyləyib.

Qeyd edilib ki, ulu öndər Heydər Əliyev istər Azərbaycan ədəbiyyatının klassikləri olan Nizaminin, Nəsiminin, Füzulinin, Molla Pənah Vaqifin, Hüseyn Cavidin, Cəfər Cabbarlının, istər yeni dövrün görkəmli şair və yazıçılarının əsərlərinin nəşri, ölkəmizin hüdudlarından kənarda təbliği, istərsə də yubiley mərasimlərinin keçirilməsi, abidələrinin ucaldılması, xatirələrinin əbədiləşdirilməsi istiqamətində mühüm işlər görüb. Bununla da Ulu Öndər bir tərəfdən ölkəmizin və xalqımızın dünyada daha yaxından tanınmasına, digər tərəfdən millətimizin mənəvi baxımdan daha da zənginləşməsinə etibarlı zəmin yaradıb.

Ulu Öndərin Azərbaycan mədəniyyətinin və mənəviyyatının himayədarı olduğunu deyən R.Hüseynov müdrik siyasətçi Heydər Əliyevin hələ sovet dövründə ölkə mədəniyyətinin inkişafı üçün əlindən gələni etdiyini vurğulayıb. Bildirilib ki, “Kitabi-Dədə Qorqud” dastanının 1300 illik yubileyinin UNESCO xəttilə beynəlxalq səviyyədə qeyd edilməsi Ümummilli Liderin tarixi xidmətlərindən biridir. Nəsiminin 600 illik yubileyinin UNESCO səviyyəsində keçirilməsi ulu öndər Heydər Əliyevin klassik irsə münasibətinin nəticəsi idi.

Muzeydə hazırlanmış 10 lövhədən ibarət sərgi ümummilli lider Heydər Əliyevin 30 ildən artıq müddətdə Azərbaycan ədəbiyyatı və incəsənətinə verdiyi töhfələrin mənzərəsini fotoşəkillərin, sənədlərin dili ilə əyani nümayiş etdirir.

Diqqətə çatdırılıb ki, görkəmli dövlət xadimi Heydər Əliyevin böyüklüyünü, onun şəxsiyyətinin Azərbaycan və dünya üçün müstəsnalığını zaman ötdükcə daha artıq dərk edirik. Ümummilli Lider müasir Azərbaycan dövlətini qurub və onun gələcəkdə yüksəlməsi üçün möhkəm təməllər yaradıb. Azərbaycanın bütün tarixi boyu qazandığı sərvətləri sırasında ən qiymətlisi onun istiqlalıdır, müstəqilliyidir.

Tədbirdə muzey direktorunun elmi işlər üzrə müavini, filologiya elmləri doktoru Xatirə Bəşirli “Heydər Əliyev və dil siyasəti”, professor Kamil Allahyarov “Heydər Əliyev türkdilli xalqların ədəbiyyatının hamisi kimi”, filologiya elmləri doktoru Şəfəq Əlibəyli “Heydər Əliyev: poeziya sevgisi” və muzeyin elmi katibi, filologiya üzrə fəlsəfə doktoru Nuranə Əsədullayeva “Heydər Əliyev və ədəbiyyat” mövzusunda məruzələrlə çıxış ediblər.