Fransa Respublikasının Ain bolgəsinin senatoru Silvi Qo-Şavan bəyanatla çıxış edərək ermənilər tərəfindən Azərbaycan Respublikasının ərazilərinin işğalı və mülki əhaliyə qarşı törədilən təcavüzü qəti şəkildə pisləyib.
O, xatırladıb ki, erməni silahlı qüvvələri Dağlıq Qarabağ və yeddi ətraf rayonu qanunsuz şəkildə işğal altında saxlayır. Senator Ermənistanı davamlı olaraq həyata keçirdiyi təhriklərdən əl çəkməyə çağırıb və BMT Təhlükəsizlik Şurasının erməni hərbi qüvvələrinin işğal edilmiş ərazilərdən geri çəkilməsi ilə bağlı qətnamələrinə əməl edərək, beynəlxalq hüquqa hörmət etməyi ondan tələb edib. 
Senator Silvi Qo-Şavan Azərbaycanın birtərəfli qaydada atəşkəs elan etmək qərarını alqışlayıb  və Ermənistandan  da eyni addımı atmağı tələb edib.

« Mülki əhalini qadın və uşaqlara məhəl qoymadan, qətlə yetirən Ermənistan ordusu tərəfindən işğal edilmiş Dağlıq Qarabağ bölgəsi və ona bitişik rayonlar, Fransanın iqtisadi tərəfdaşı və terror əleyhinə mübarizədə mühüm müttəfiqi olan və sabitlik adası sayılan Azərbaycan Respublikasının ərazisidir. Ermənistan ordusu dərhal və heç bir qeyd-şərtsiz həmin ərazilərdən çıxarılmalıdır »,-deyə Ain Departamentinin senatoru 
Fransa Senatının Xarici əlaqələr komissiyasının üzvü Silvi Qo-Şavan bəyan edib.(modern.az)