İslam Əməkdaşlıq Təşkilatına üzv Dövlətlərin Jurnalistləri Assosiasiyası və Beynəlxalq Avrasiya Jurnalistləri Fondu tərəfindən “İslam həmrəylinin gücləndirilməsində medianın rolu” mövzusunda tədbir keçirilib.

Tədbirdə İslam ölkələrinin Azərbaycanda akreditə olunmuş fövqəladə və səlahiyyətli səfirləri və eləcə də səfirliklərin nümayəndələri, Prezident Administrasiyasının ictimai siyasi şöbəsinin və XİN-in məsul şəxsləri, Dini Qurumlarla İş üzrə Dövlət Komitəsinin əməkdaşları, Misirin aparıcı media orqanlarının rəhbərləri iştirak edib. Tədbirdə çıxış edən İƏT üzv Dövlətləri Jurnalistlər Assosiasiyasının sədri Fazil Abbasov qeyd edib ki, 2017-ci il Azərbaycan Prezidenti tərəfindən İslam Həmrəyliyi ili elan edilib və bu ildə həyata keçirilən tədbirlər, onların əhəmiyyətindən danışıb.

F. Abbasov bildirib ki, İslam dövlətləri siyasi istiqamətlərinə, məzhəblərinə görə bir-birinə qarşı tarix boyu mübarizə aparıb: “ Bir çox hallarda bu mübarizələr qanlı müharibələrlə nəticələnib. Müsəlmanlara düşmən kimi baxan dairələr bundan istifadə ediblər və edirlər. Buna görə də Azərbaycan Prezidenti 2017-ci ili İslam Həmrəyliyi İli kimi elan edib. İl ərzində ölkəmizdə islam həmrəyliyini təbliğ edən silsilə tədbirlər keçirilib. Hesab edirəm ki, onların pik nöqtəsi bu ilin mayında keçirilən Dördüncü İslam Həmrəyliyi Oyunları sayılır”. O həmçinin bu həmrəyliyin möhkəmləndirilməsində medianın rolundan danışıb və bildirib ki, İslam Əməkdaşlıq Təşkilatına üzv Dövlətlərin Jurnalistləri Assosiasiyası islam ölkələrinin media qurumları ilə əməkdaşlıq etməyə hazırdır. Daha sonra çıxış edən Beynəlxalq Avrasiya Fondunun prezidenti Umud Mirzəyev bildirib ki, İslam bizi birləşdirən dəyərdir. U. Mirzəyev keçirilən tədbirin əhəmiyyətini yüksək qiymətləndirib. O vurğulayıb ki, tədbir Misir jurnalistləri ilə Azərbaycan jurnalistləri arasında möhkəm əməkdaşlığın əsasını qoyacaq.

Tədbirdə çıxış edən PA-nın ictimai-siyasi şöbəsinin məsul əməkdaşlı Bəhruz Həsənov bildirib ki , Azərbaycan öz tarixi və maddi-mənəvi irsinə görə Misirdən geri qalmır. O qeyd edib ki, Azərbaycanla Misirin həmİƏT, həm də ikitərəfli əməkdaşlıq çərçivəsində media sahəsində əlaqələrinin qurulması olduqca vacibdir: “Hesab edirəm ki, bu gün keçirilən tədbir ölkələrimiz arasında media sahəsində əlaqələrdə yeni mərhələnin başlanğıcı olacaq”. B. Həsənov həmçinin qeyd edib ki, Azərbaycan İslam sivilizasiyasının formalaşmasına töhfə verən dövlətdir. O vurğulayıb ki, Azərbaycandakı ilkin islamı abidələri dövlət və xalq tərəfindən qorunur. PA əməkdaşının sözlərinə görə, Azərbaycanda tarix boyu dinlərarası həmrəylik olub: “Birmənalı şəkildə deyə bilərik ki, Azərbaycan islam həmrəyliyi modelini yarada bilib və bu model diqqətlə öyrənilməlidir. Azərbaycanda fərqli məzhəblərə məxsus insanların birgəyaşayışı islama terror dini kimi baxanlara ən yaxşı cavabdır. Bu il ölkəmizdə “İslam Həmrəyliyi İli”nin elan olunması həm Azərbaycanda , həm də islam dünyasında həmrəyliyin möhkəmlənməsinə töhfə verir”. B. Həsənov vurğulayıb ki, Azərbaycan Prezidenti dəfələrlə çıxışlarında bildirib ki, bəzi dairələr islama terror dini kimi baxsalar da, islam sülh və mərhəmət dinidir. Azərbaycanın özünün də terrordan əziyyət çəkdiyini deyən PA əməkdaşı vurğulayıb ki, bu yaxınlarda Misirdə baş verən dəhşətli terror aktından sonra Azərbaycan Prezidenti misirli həmkarına başsağlığı verib, Azərbaycan xalqının Misir xalqının kədərinə şərik olduğunu demişdi: “ Azərbaycan terrordan əziyyət çəkən ölkə kimi bütün təzahürlərinə qarşı mübarizə aparır. Bizim ərazilərimizin 20 faizi Ermənistan tərəfindən işğal edilib və bu ərazilərdə islama aid abidələr məhv edilib. Həmçinin məscidlər dağıdılıb və ATƏT və digər beynəlxalq təşkilatlar tərəfindən təsdiq edilib: “Bizim İƏT-lə qarşılıqlı faydalı əlaqələrimiz var. Lakin Ermənistanın İƏT dövlətləri ilə əlaqələr qurmağa çalışması islam meyarlarına ziddir”.

O çıxışının sonunda qeyd edib ki, Azərbaycan Prezidenti öz çıxışlarında qeyd bildirib ki, Azərbaycan İslam Həmrəyliyinin təmin edilməsi dövlət siyasətinin əsas istiqamətlərindən biri hesab edir və beynəlxalq aləmdə də islam dəyərlərinin düzgün təbliğ olunmasına çalışır: “Məqsəd İslam həmrəyliyi haqqında dünya ictimaiyyətinin düzgün fikrini formalaşdırmaq, qərb və islam sivilizasiyası arasında körpü rolunu oynamaqdır. Dördüncü İslam Həmrəyliyi Oyunlarının da keçirilməsi bu istiqamətdə atılmış addımdır”.