Azərbaycan Respublikası  Mədəniyyət Nazirliyinin Mədəni və Yaradıçı Sənayelərin Təşviqi üzrə qrant müsabiqəsi çərçivəsində  “Gələcəyin Memarlığına Dəstək” İctimai Birliyi “ tərəfindən həyata keçirilən “Azərbaycanda tarixi-mədəni abidələrin rəqəmsallaşdırılması sahəsində araşdırma” layihəsinin məqsədi mədəniyyət müəssisələrində tarixi-mədəni abidələrin rəqəmsallaşdırılması ilə bağlı vəziyyətin qiymətləndirilməsi idi. Bu məqsədə nail omaq üçün 10 - 14 fevral 2025-ci il tarixlərində Quba rayonunda fəaliyyət göstərən A. A. Bakıxanovun Memorial-Ev Muzeyi, Quba Soyqırımı Memorial Kompleksi və Heydər Əliyev Mərkəzinin, həmçinin Qusar rayonunun Tarix-Diyarşünaslıq Muzeyi və Qusar Dövlət Rəsm Qalereyasının nümayəndələri arasında  təşkilatın eksperti Sədaqət Qəmbərova tərəfindən sorğu keçirilmişdir.  Sorğuda Abbasqulu Ağa Bakıxanovun Ev-Muzeyinin filial müdiri İradə Əlməmmədova

 Quba Heydər Əliyev Mərkəzinin elmi işçisi Şövqiyə Seyidzadə və bələdçi Simnarə Tağıyeva  Quba Soyqırımı Memorial Kompleksinin direktoru Rəxşəndə Bayramova

 Qusar rayon Tarix-Diyarşünaslıq Muzeyinin direktoru Xatirə Nağıbəyova

  Qusar Dövlət Rəsm Qalereyasının direktoru Nərminə Salmanova və fond mühafizi Rüstəmbəy Nağıyev iştirak etmişdir.

Görüşlər zamanı mədəniyyət nümayəndələri muzeylərin tarixi, eksponatlar, həyata keçirilən tədbirlər barədə ətraflı məlumat vermiş və rəqəmsallaşdırma ilə bağlı anket suallarını cavablandırmışlar. Sorğunun nəticələrinə əsasən mədəniyyət müəssisələrinin fəaliyyəti və idarə olunması tam rəqəmsallaşdırılıb.  Mədəni irsin rəqəmsallaşdırılması prosesi isə artıq başlayıb və davam etdirilir.

Tarixi irsin rəqəmsallaşdırılmasından danışarkən Quba Soyqırımı Memorial Kompleksinin fəaliyyətini xüsusi olaraq qeyd etmək lazımdır. Kompleksin ayrıca veb-səhifəsi var. Burada onun tarixi, missiyası, məqsədi, keçirilən təbirlər və s. barədə ətraflı məlumatlar yerləşdirilib. Komplekslə bağlı həm azərbaycan, həm də ingilis dillərində virtual turlar təşkil edilir. Həmçinin burada keçirilən müxtəlif tədbirlər, görüşlər və layihələr YouTube platforması üzərindən geniş şəkildə təqdim edilir.  Rəqəmsallaşdırma prosesləri ilə peşəkar mütəxəssislər məşğul olur.  

Digər muzeylərə gəlincə, orada mühafizə edilən eksponatlar kompüterə daxil edilib və kataloqlaşdırılıb. Məsələn, 2024-cü ilin sonuna Qusar rayon Tarix-Diyarşünaslıq Muzeyində eksponatların hamısı kompüterə daxil edilib və təqribən 70 faizi kataloqlaşdırılıb. Qusar Dövlət Rəsm Qalereyasında saxlanılan rəsm əsərləri həm kağız daşıyıcılarında, həm də kompüterdə mühafizə olunur.

Qeyd edilən mədəniyyət müəssisələri haqqında ümumi məlumatlar vikipediyada öz əksini tapır, həyata keçirilən tədbirlərin təşviq edilməsi üçün sosial mediadan aktiv şəkildə istifadə edilir.

Müəssisələrin nümayəndələri həmçinin ehtiyaclarını da qeyd etdilər. Belə ki, onların İKT sahəsində peşəkar işçilərə, daha müasir rəqəmsal vasitələrə, ümumilikdə fəaliyyətlərinin modernləşdirilməsinə, Abbasqulu Ağa Bakıxanovun Ev-Muzeyinin isə tam təmirə ehtiyac var.