Hələ 20 il əvvəl Azərbaycanda bərpaolunan enerji mənbələrindən istifadə olunması üzrə Dövlət Proqramı qəbul edilib. O zaman Azərbaycan öz enerji ehtiyaclarını təmin etmişdi, hətta neft və qaz ixracatçısı kimi tanınmış dövlət idi, belə ki, enerjinin alternativ imkanlarına və mənbələrinə ehtiyacımız yox idi. Təsdiq olunan dövlət proqramı məcburi deyil, düşünülmüş, gələcəyə yönələn atılmış addım idi. Fact-info.az  xəbər verir ki, bunu Əqli Mülkiyyət Agentliyinin İdarə Heyətinin sədri Kamran İmanov oktyabrın 30-da “Əqli mülkiyyət və innovasiyalar yaşıl gələcək naminə (COP29-a doğru)” mövzusunda dəyirmi masadan öncə keçirilən brifinqdə deyib.

Agentlik rəhbəri, həmçinin Energetika Nazirliyi yanında Bərpa Olunan Enerji Mənbələri Dövlət Agentliyinin yaradıldığını, 2010-cu ilin Azərbaycanda “Ekologiya İli” xatırladıb, 2024-cü ilin isə “Yaşıl dünya naminə həmrəylik ili” elan edildiyini qeyd edib.

“2023-cü ilin Dünya İqtisadi Forumunun hesabatına əsasən, 120 ölkəyə aid Enerji keçidi indeksləri müəyyən edilib. Azərbaycanın indeksi 62-yə bərabərdir və dünya reytinqində 32-ci yeri tutur, eyni zamanda, bir sıra inkişaf etmiş ölkələri üstələyir; bu sıraya o cümlədən G7, Avropa İttifaqına və İqtisadi İnkişaf və Əməkdaşlıq Təşkilatına üzv ölkələr (məsələn, Litva, Yunanıstan, İtaliya, Polşa, Belçika, Slovakiya, Çexiya, Bolqarıstan) daxildir.

Bu göstəriciyə görə, Azərbaycan neft və qaz istehsalçıları və idxal edən ölkələr sırasında liderdir”, - deyə Kamran İmanov bildirib. O, həmçinin qeyd edib ki, dünya birincisi olan İsveç enerji indeksinin hər vahidinin formalaşmasına Azərbaycandan iki dəfədən çox vəsait sərf edir, ABŞ isə üç dəfədən çox.

Yaranan iqlim dəyişiklikləri ilə bağlı problemin başında duran enerjidir və onun həllinin açarı da enerjidir.