Azərbaycan Yazıçılar Birliyində şair, puplisist Əvəz Müəllim Hacıyevin 65 illik yubileyi qeyd olundu. Tədbiri öncə AYB-nin rəsmisi Dayandur Sevgin açaraq yubilyarı təbrik etdi və toplantı iştirakçılarına uğurlar arzuladı. Daha sonra tədbirin aparıcı  f.f.d. Tahir Şirvanlı Əvəz Müəllim Hacıyevin yaradıcılığına nəzər salaraq şairin Azərbaycan ədəbiyyatına gətirdiyi yeniliklərlə bağlı fikirlərini açıqladı. O, şairin yaradıcılığını bir neçə aspektdən təhlil etdi.

Tədbirdə f.f.d. Tariyel Abbaslı, Azərbaycan Texniki Universitetinin professoru Tərxan Cəbrayılov, şairə Gilə Bayramova, şair, puplisist Fəxrəddin Meydanlı,  pedaqoji sahədə uzun müddət çalışan Mürvət Mirzəyev, Sosial Rifah və Tədqiqatlar İctimai Birliyinin sədri, Fact-info.az saytının baş redaktoru Əkrəm Bəydəmirli və digərləri çıxış edərək  Əvəz Müəllim Hacıyevin 65 illik yubileyi münasibətilə onu təbrik etdilər,  yaradıcılıq uğurları arzuladlar.

 Xatırladırıq ki, fəlsəfi baxışları, söz sənətinə fərqli yanaşmaları ilə tanınan, bir sıra kitabların müəllifi Əvəz Müəllim (Hacıyev Əvəz Dadaşxan oğlu) ilk şeirlərini orta məktəb illərindən yazmağa başlamışdır. Qəzet və jurnallardakı ədəbi fəaliyyəti əsasən 2000-ci ildən ardıcıl və davamlı olmuşdur. “Qələm” qəzetində “Elm, təhsil,incəsənət” üzrə şöbə müdirü işləmişdir. Müxtəlif qəzet və jurnallarda (“Yurd”,,”Beyrüs- Səfa”) publisistik yazıları və şeirləri çap olunmuşdur. Qarışıq janrlardan ibarət “Sənli günlərim” adlı kitabı çapdan çıxmış və oxucular tərəfindən rəğbətlə qarşılanmışdır.

Əvəz Müəllimin yaradıcılığında Təbriz önəmli yer tutur. Onun yaradıcılığı Vətən dərdinin dilində danışa bilir. Onun bütöv Azərbaycan ağrısı ənənəvi mövzunun bu günün dili ilə danışan obrazıdır.

Əvəz Müəllim «Təbriz küçələrində uyuyan Qaragilə» Rübabəni yada salır, sanki bu qədim həsrət dolu xalq mahnısını Ərdəbildən Təbrizəcən dinləyə-dinləyə gedirsən. Özü də göz yaşları altında. Yaxud ustad Şəhriyarın xatirəsinə həsr olunmuş «Xoşginabda keçən günlər», «Cənub həsrətli Novruz günləri», «Şahbani – yoxsa cani» esselərini də həyəcansız oxumaq mümkün deyil. Əvəz Müəllimin vətəndaşlıq qeyrəti ağır Qarabağ ağrılarının altında çiyinlərini bükmür. Bu ağrılara Şuşa-Təbriz yolu çəkir və inanır ki, bir gün Bakıdan iki yol birbaşa ayrıca maneəsiz sərhədsiz keçəcək. Biri Şuşaya, biri də Təbrizə.