Vətən müharibəsində könüllü iştirak edən, 50-dən artıq çətin cərrahi əməliyyat həyata keçirən tanınmış həkim Anar Yusibov əməkdaşımızla söhbəti zamanı Azərbaycanda cərrahiyyə sahəsinin real durumuna, bu sahədə baş verən proseslərə qısa nəzər salır:

 -Tibbdə cərrahiyyə ən ağır sahələrdən biridir. Qənaətimcə, Azərbaycanda bu sahə inkişaf etməkdədir. Bu gün cərrahiyyənin bir çox sahələri üzrə kifayət qədər peşəkar kadrlarımız yetişib. Ölkəmizdə  elə mürəkkəb cərrahi əməliyyatlar icra edilir ki, bunun üçün xaricə getməyə ehtiyac qalmır.

 -Mövcud  tibb təhsili peşəkar kadrlar yetişdirmək üçün yetərlidirmi?  

 -Təbii ki, bir çox sahələrdə olduğu kimi, tibb sahəsində də təhsil sistemi dünyaya inteqrasiya olunmuş istiqamətdə davam edir. Dünya cərrahiyyəsində baş verən bütün yeniliklərdən xəbər tuturuq, daim öyrənirik. Xarici təcrübəni daha yaxşı öyrənmək, praktikada tətbiq etmək  peşəkar kadr üçün zəruridir. Cərrahiyyə sahəsində baş verən yeniliklərə, mövcud problemlərə həsr olunan mütəmadi olaraq xarici ölkələrdə keçirilən toplantılara qatılırıq. Ən son yeniliklərlə tanış olaraq təcrübə mübadiləsi aparırıq. Bütün bunlar bizim fəaliyyətimizə effektli təsir göstərir və həmçinin gənc kadrların yetişməsinə təkan verir.

 -Siz qeyd etdiyiniz kimi, cərrahiyyə mürəkkəb, çətin sahədir. Ümumiyyətlə, peşəkar cərrah olmaq üçün bu sahədə təhsil alan tələbəyə daha nə lazımdır?

 -Cəsarət, inam öz yerində olmaldır. Həmçinin işğüzarlıq, öz üzərində daim çalışmaq  lazımdır. Bir cərrahın yetişməsi üçün uzun zaman keçir. Bəzən bir tələbə ömrünün 15 ilini bu sahədə cərrah kimi yetişməyə həsr edir. Digər tərəfdən cərrahın təminatı yüksək olmalıdır ki, həmin şəxs yalnız inkişaf, peşəkar xidmət haqqında fikirləşsin. Mən özüm xeyli tələbələr yetişdirmişəm. Bəzən elə olur ki, onlar sonradan yaxşı təminata görə, xaricdə çalışmağa üstünlük verirlər. Xaricə beyin axınını sakit qarşılmaq olmur.  Azərbaycanda, xüsusilə, bölgələrimizdə açılan tibb ocaqlarında peşəkar kadrların çalışmasına ehtiyac var. Uzun illər, böyük zəhmətlə yetişdirilən normal  cərrah xaricdə deyil, ölkəmizdə insanların sağlamlığının keşiyində durmalıdır.Ümid edirəm ki, zaman keçdikcə bu məsələlər  çözüləcək.

 -Yaşlı nəslin nümayəndələri yeni metodlarla, tibbi avadanlıqla çalışa bilirlərmi?

 -Müəyyən bir yaş dövrü keçən yaşlı nəslin bəziləri öz üzərində çalışır, yenilikləri daha tez qəbul edərək fəaliyyətini davam etdirir. Bu yaxşı haldır. Amma elə də olur ki, keçmiş metodlarla çalışan və yeni müalicə protokollarını qəbul etmək istəməyən şəxslər var. Onlar sovet təcrübə məktəbi keçiblər. Yeniliklərə adekvat deyillər. Dünyada tibbi sahəsi sürətlə dəyişir. O baxımdan bu sahədə çalışan hər kəs yeniliklərə açıq olmalıdır.       

 Fact-info.az