2001-ci ildə Avropa Şurası Parlament Assambleyasına Azərbaycan üzv olandan sonra bu təşkilatla daim qarşılıqlı əməkdaşlığın genişlənməsinə çalışıb. Ölkəmiz milli maraqlarımızı, beynəlxalq prinsipləri əsas tutaraq bütün öhdəlikləri yerinə yetirib. Lakin bu təşkilatda Azərbaycana qarşı ikili standartlar hökm sürüb. Uzun illər ərzində bu qurum Ermənistanın Azərbaycana qarşı təcavüzü və ərazilərin işğalı faktına qarşı heç bir tədbir görməyib, yalnız ara sıra heç bir hüquqi çəkisi olmayan bəyanatlar və qərarlar verməklə kifayətlənib. Halbuki, bir quruma üzv olan iki ölkədən birinin digərinin ərazisini işğal etməsi faktına görə ən azından işğalçının səs hüququ əlindən alına bilərdi.

Ermənistan 30 ildən artıq müddətdə bütün beynəlxalq prinsipləri pozdu, Azərbaycana qarşı təcavüzkar siyasət həyata keçirib. Ermənilər  əsir düşən mülki insanlarımıza qarşı heç bir normaya, insanlığa sığmayan hərəkətlər ediblər. Şəhərlərimizi, yaşayış yerlərimizi işğal dövründə yer üzündən siliblər. Demək olar ki, Ermənistan Avropa Şurasının və digər beynəlxalq təsisatların öhdəliklərini yerinə yetirməyərək, bütün qanunsuz əməllərini davam etdirdi. Adıçəkilən bu təşkilatlar ötən dövr ərzində Ermənistanın bütün qanunsuzluqlarına, hüquqa zidd əməllərinə  göz yumdu.

 Əvvəl münaqişələrə qarışmadığını deyən AŞPA Azərbaycana qarşı qərəzli qətnamələr qəbul etməyə başladı. Xüsusilə Fransa Azərbaycana qarşı açıq şəkildə düşmənçiliyə keçdi. Belə görünür ki, onlara müstəqil Azərbaycan lazım deyil. Eyni siyasət xəttinə sadiq qalan Fransa Milli Assambleyası və Senatı da Azərbaycana qarşı qətnamələr qəbul etdi. İndi də  Almaniyanın əli ilə AŞPA-da Azərbaycana qarşı məsələni gündəliyə gətirdi. Amma ölkəmizlə bağlı səsləndirilən arqumentlər də tamamilə yanlış və qərəzli idi.

Azərbaycana qarşı isə əsassız iddialar ortalığa atılır. AŞPA 23 oktyabr 2023-cü il tarixində “Dağlıq Qarabağda humanitar vəziyyət” adlı qətnamə qəbul edib. Həmin qətnamənin 23-cü bəndində təşkilat açıq-aşkar Azərbaycanı təhdid edilərək, 19 sentyabrda baş tutan lokal xarakterli anti-terror əməliyyatlarını hərbi əməliyyatlar kimi qiymətləndirərək, “Dağlıq Qarabağın erməni əhalisinin humanitar vəziyyəti”ndən ciddi narahatçılıq ifadə edib və Azərbaycan nümayəndə heyətinin etimadnaməsini 2024-cü ilin ilk iclasında tanımamaqla hədələdi.

AŞPA-da mövcud olan dözülməz irqçilik, Azərbaycanofobiya və İslamofobiya mühiti fonunda Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib.

 Avropa Şurası Parlament Assambleyasının (AŞPA) qış sessiyasının açılış günündə (22 yanvar) AŞPA-da ölkəmizin nümayəndə heyətinin etimadnamələri təsdiq edilməmişdir. Deputatların etimadnamələrin substantiv əsaslarla mübahisələndirilməsi ilə bağlı təşəbbüsü Sosialistlər siyasi qrupunun rəhbəri Frank Şvabe irəli sürmüş və həmin təşəbbüs təsdiqlənmişdir.

Mənim qənaətimcə, avropalı parlamentarilər, siyasət adamları dərk etməlidirlər ki, onların riyakar addımları xalqımızın iradəsinə təsir göstərə bilməyəcək. Azərbaycan haqq yolundadır, bizim yolumuz beynəlxalq hüquq və ədalət üzərində qurulub. Güclü Azərbaycan bundan sonra da öz ədalətli mövqeyini bütün əsassız təzyiqlərə baxmayaraq davam etdirəcək. AŞPA-nın belə qərəzli davranışları həmin qurumun özünün nüfuzuna böyük zərbə vurur. Onu da Avropa ictimaiyyəti unutmamalıdır ki,  Azərbaycan 30 illik işğaldan əziyyət çəkmiş və ədaləti özü bərpa etmiş ölkə olaraq yeni sülh prosesinin müəllifi oldu. Bu cür addımlarımızın nəzərə alınmaması isə AŞPA-nın siyasi riyakarlığını bir daha təsdiq etmiş olacaq. Mən güman edirəm ki, Avropa məkanında reallığı düzgün dəyərləndirən, beynəlxalq vəziyyəti təhlil edib anlayan qüvvələr AŞPA-nı belə qərəzli yollardan çəkindirəcəklər.

 Azərbaycan Tibb Universitetinin professoru
 Nuru Bayramov