2019-2022-ci illərdə Azərbaycanın Qoşulmama Hərəkatında uğurlu sədrliyi və üzv dövlətlərin yekdil qərarı ilə bu sədrliyin daha bir il uzadılması görülən işlərdən, əldə edilən yüksək nəticələrdən xəbər verir. Azərbaycanın uğurlu sədrliyi Qoşulmama Hərəkatının ideologiyasının əsasını təşkil edən fundamental prinsiplərə və dəyərlərə sarsılmaz sadiqliyinin sübutudur. Azərbaycan qlobal problemlərin həllində fəal və məsuliyyətli yanaşma nümayiş etdirərək qlobal təşəbbüslər irəli sürüb. Azərbaycanın qurumda səmərəli və prinsipial rəhbərliyi Qoşulmama Hərəkatının qlobal səhnədəki mövqeyinin gücləndirilməsində mühüm rol oynayıb. Qlobal həmrəylik, ədalətə sarsılmaz sadiqlik, institusional inkişaf kimi xüsusiyyətlərə əsaslanan fəaliyyəti ilə Azərbaycanın Hərəkata sədrliyi dövründə təsisatın beynəlxalq nüfuzu və çəkisi xeyli artıb.

Fact-info.az-ın məlumatına  görə,  bu fikirləri AZƏRTAC-a açıqlamasında Pakistan–Azərbaycan Məzunları Birliyinin qurucusu, strateji kommunikasiyalar üzrə pakistanlı ekspert, COP28-in iştirakçısı Qayser Nəvvab söyləyib.

COVID-19 pandemiyası dövründə Azərbaycanın qlobal əməkdaşlığa sarsılmaz sadiqlik nümayiş etdirdiyini xatırladan ekspert bildirib: “Azərbaycan sədrliyi dövründə Qoşulmama Hərəkatının liderlər səviyyəsində onlayn Zirvə toplantısının təşəbbüskarı olub və 2020-ci ildə BMT Baş Assambleyasının xüsusi sessiyasını təşkil edib. COVID-19 pandemiyası dövründə Azərbaycan dünyaya nümunə oldu. Rəsmi Bakı vaksinlərin ədalətli paylanması məsələsini gündəmə gətirməklə ümumi qlobal çağırışlara qarşı kollektiv cavab tədbirlərinin görülməsi üçün əlindən gələni etdi. Azərbaycan özü əksəriyyəti Qoşulmama Hərəkatına üzv olan 80-dən çox ölkəyə maliyyə yardımı və humanitar dəstək göstərdi. Azərbaycanın təşəbbüsü ilə bütün ölkələr üçün peyvəndlərə ədalətli və universal çıxışla bağlı BMT qətnamələri qəbul edildi.

Bir sözlə, Qoşulmama Hərəkatının sədri kimi Azərbaycanın fəal mövqeyi nəinki həmrəylik prinsiplərini gücləndirdi, həm də qlobal rifahın qarşılıqlı dəstəyə bağlı olduğunu sübuta yetirdi. Qlobal həmrəylik nümayiş etdirən Azərbaycan yüksək səviyyəli toplantılar keçirməklə, dialoqu təşviq etməklə üzv ölkələrin bir-biri ilə sıx əməkdaşlıq həyata keçirmələrinə şərait yaratdı”.

Qayser Nəvvab Azərbaycanın sədr kimi Qoşulmama Hərəkatının institusional inkişafında mühüm rolunu vurğulayıb. Qeyd edib ki, məhz Bakının sədrliyi dövründə, yəni, 2021-ci ildə Qoşulmama Hərəkatının Parlament Şəbəkəsi, 2022-ci ildə Gənclər Təşkilatı, 2023-cü ildə isə Qadınlar Platforması yaradılıb. Hərəkatın institusional imkanlarının genişləndirilməsində də Azərbaycanın perspektivli yanaşması diqqət çəkir. Bu təşəbbüslər nəinki iştirak imkanlarını şaxələndirdi, həm də müxtəlif demoqrafik təbəqələrin Hərəkata cəlb olunmasına yol açdı. Azərbaycanın institusional inkişafa uzaqgörən yanaşması onun fəal liderliyinin sübutudur, Qoşulmama Hərəkatının struktur cəhətdən dayanıqlılığına və aktuallığına davamlı təsir göstərir.

Azərbaycanın sədrliyi dövründə mühüm tədbirlərə ev sahibliyi etməklə qlobal məsuliyyətə sadiqliyini xatırladan ekspert diqqətə çatdırıb: “2023-cü ildə pandemiyadan sonrakı bərpaya həsr olunmuş sammit Azərbaycanın qlobal çağırışların həllinə proaktiv yanaşmasını özündə əks etdirdi. Azərbaycanın Afrikada və inkişaf etməkdə olan kiçik ada dövlətlərinə pandemiyadan sonrakı bərpa prosesini dəstəkləməsi və 1 milyon ABŞ dolları məbləğində maliyyə yardımı göstərməsi çox nəcib hərəkətdir. Bu, ölkə rəhbərliyinin humanistliyinin, beynəlxalq həmrəyliyə sadiqliyinin göstəricisidir. Həm də digər ölkələrə nümunədir”.

Bu ilin yanvarından Qoşulmama Hərəkatına sədrliyin Uqandaya keçdiyini xatırladan beynəlxalq ekspert Azərbaycanın bu mötəbər təsisatın “sədrlik Troykası”nın üzvü kimi onun fəaliyyətində və uğurlarında yaxından iştiraka davam edəcəyini bildirib. Diqqətə çatdırıb məsuliyyətli və təşəbbüskar sədr kimi Azərbaycanın töhfəsi qurumun qlobal çağırışlarla mübarizədə uğurlarını və əhəmiyyətini qoruyacaq. “Sədrlik Troyka”sında təmsil olunmaqla Azərbaycan problemsiz keçidi təmin edir, davamlılığı və sabitliyi gücləndirir, son nəticədə Qoşulmama Hərəkatının müasir qlobal problemlərin həllində effektivliyini artırır.

“Azərbaycanın beynəlxalq əməkdaşlığın təşviqi ilə bağlı davamlı öhdəliyinin Qoşulmama Hərəkatı üzvlərinin təşəbbüslərində və siyasətlərində öz əksini tapacağı şübhəsizdir”, - deyə beynəlxalq ekspert fikirlərini yekunlaşdırıb.